Aapunguli oya nyanyukilwa etokolo lyAatamaneki

Aanangeshefa nenge aapunguli mboka ye na omaliko gawo mu South Afrika oya nyanyukilwa etokolo lyAatamaneki mo South Afrika, sho ya ekelehi ipotha yiilonga yokoraputo mbyoka ya li ya ningilwa Omupresidende gwongudu tayi pangele Jacob Zuma.

Aapunguli oya nyanyukilwa oshinima shika molwashoka aniwa osha kutha South Afrika monkalo yopapolotika ka ku shiwike kutya oyu uka peni. Ano ngashiingeyi oye na omukumo okutunga mu South Afrika, molwashoka onakuyiwa ya yela.
Zuma okwa uvaneka kutya ota ka tsikile nokukalekapo omilandu dhi li nawa koongeshefa, ndhoka dha etwa po kongundu yawo yo African National Congress (ANC).
Aatseyinawa miikwapolitika oya ti kutya ngashiingeyi Zuma ota ka vula okuungaunga nawa nuupyakadhi womukithi gwo HIV-AIDS moshilongo, ke na iipotha ye mu tegelela.
Oshiwike shika, Omutamaneki gopakathimbo Mokotedi Mpshe okwa li a popi kutya ngoka a li nale omutse gwOshikondo shokukondjitha iimbuluma, okwa li a ende pevi oshikondo oshipanguli, sho Oshikondo shia sha ningile Zuma oshipotha shika.
Oshikondo Oshitamaneki sha South Afrika/Nationa Prosecuting Authority (NPA)osha ti kutya oshipotha shika osha patwa na Zuma ita ka ningilwa we oshipotha sha sha.
Zuma, ngoka e li okandadate yongundu yo African National Congress (ANC) okwa tegelelwa a ka sindane nomawi ogendji momahogololo gOpaupresidende, ngoka taga ka kala ko momasiku 22 gomwedhi nguka.
‘Ohoni noshipotha shika shiilonga yokoraputo otayi kala nokugandja ethano ewinayi kEpangelo sigo aluhe,’ Omutseyinawa miikwapolitika mOunivesiti ya Johannesburg, Adam Habib, osho a popi ngaaka. Oshinima shika osha etele wo aantu omaipilo ngele Oshikondo oshipanguli sha South Afrika otashi longo tuu pauyuuki.
Momahogololo ngaka, ANC okwa taalela eshongo enene kopaati ndjoka opo ya totwa po yo Congress for the People (COPE),ndjoka ya li ya totwa po kaantu ya li ye na iipundi mEpangelo lya South Afrika – pethimbo Thabo Mbeki a li koshipundi.