Aapunguli naProwealth ya yi kohofa

AAPUNGULI mboka ya kanitha iimaliwa yawo konima yokubangolota kwehangano lya Prowealth momumvo 2009 otaya futitha Namibia Financial Institution Supervisory Authority[Namfisa] noshowo ehangano lyaayalulimambo ndyoka lyali ha li yalula omambo ga Prowealth.

Aapunguli ayehe kumwe omilongo 87 mboka yi inekelele Prowealth iimaliwa yawo opo eyi ya pungulile neitaalo kutya ota yi ka mona iihohela oyo ya eta oshipotha shoka yahala Namfisa opamwe naayalulimambo yehangano SGA ye ya fute oodola oomiliona 105, 25. Ehangano ndyoka lya li lya pewa oshinakugwanithwa okuhalakanithapo Prowealth, lya Alwyn van Straten nalyo oli mongundu yaaindili mboka ya hala okufutilwa. Oonakwiindila oya kankamekela eindilo lyawo kokutya Namfisa na SGA oya longo nuuhasha nonokwaanakonasha mokutalela ehangano ndyoka noshowo oku konakona omambo gehangano ndyoka. Nomolwuuhasha mboka oonakwiindila oya ti omukuluntu gwa Prowealth , Riaan Potgieter okwa li a mono ompito yoku yakapo iimaliwa yaapunguli pehala lyoku yi pungula ngaashi ehangano lye lyuuvaneke. Oya ti molwaashoka Prowealth okwa li iishangitha na Namfisa ongpo ehangano lyokupungula, aapunguli mbaka oya li yiitaala kutya ndyoka oli shi kwiinekelwa. Ndele shoka sha ka ndhindhilikwa ooshoka kutya ehangano ndika kalya li lya gandja omishangwahokololo tadhi ulike nkene lya longo niimaliwa yaapunguli. Omuwiliki gwehangano ndyoka okwa kala aniwa ta longitha iimaliwa yoonakupungulwa okwinyanyudha nokutsakanitha oompumbwe, no aniwa kali a a pungula iimaliwa mbyoka opo yi valele ooyene iihohela ngaashi olyo lya li euvaneko. Pamukalo ngoka ota ku tiwa, nakusa Riaan Potgieter okwa li eta opo aantu yadhiladhile kutya ehangano lye olina oshimaliwa.