Aapolisi otayi ilongekidhile omahogololo

AAPOLISI moshilongo ashihe oya lombwelwa yi ilongkidhila omahogololo gOpaupresidende nogOpaparliamende ngoka taga ka ningwa mu Namibia pehulilo lyomumvo nguka.

Pethimbo a li ta popi poshigongi shAapolisi aakuluntu mOvenduka mOmaandhaha, Inspekta-Ndjayi gwOpolisi ya Namibia, Sebastian Ndeitunga okwa lombwele Aapolisi miikondo ayihe, kutya naya ka longe iilonga yawo nawa, inaya gama ombinga pomahogololo opo ga ka ende nawa, kapu na omathindilathanokongudhi goongundu dhopapolitika.
‘Otu na okukala twa tala kutya iilyo yOopati dhopapolitika miitopolwa yetu otayi ihumbata kOveta yOopati dhopapolitika. Otu na okuungaunga naaleli yawo yopashigwana, yopaitopolwa , yopaikandjo noyopaitayi,’ Ndeitunga osho a popi ngaaka.
Ndeitunga okwa ti oshi li sha simana Opolisi ya Namibia yi kale tayi longele kumwe noongundu dhopapolitika adhihe, Okomisi yOmahogololo nonaakuthimbinga ayehe, opo iiikonga yomahogololo nomahogololo goyene gonuumvo, yi kale pambili’ ta tsikile ko ngaaka.
Okwa ti omumvo gwa zi ko, Opolisi oya kuta aagundjuka ya pita Ograde 12 e tayi yele wo Aapolisi ye li 1 878, nelalakano okutala kutya miikondo ayeihe yOpolisi omu na evuluko.
Ndeitunga okwa ti kutya Opolisi oyi ikwata noonkondo eyo pombanda lyiikulumuna yimwe ngashi, omateyo gomagumbo, uufuthi, omaningonayi gaakiintu naanona, omayako giimuna nomataaguluko goompangu dhoondjila. Okwa ti ye okwi ikwata wo iilongo yokoraputo tayi longwa kAapolisi, mbyoka yi li tayi lopotelwa Ombelewa ye ethimbo kehe.
‘Kehe gumwe okwa tegelela Aapolisi ya kale aakiintu naalumentu ye na eisimaneko, ye na oshili, ihaya gama ombinga noye na oshinakugwanithwa,’ Ndeitunga ta popi ngaaka.
Okwa pandula Aapolisi mboka haya longele pOkapale koondhila ka Hosea Kutako , mboka ta ti kutya oye shi pondola okukwata moshipala oonkambahdla dhaakwiilongo okuthiga po oshilongo ye na oshimaliwa (okeshe) shomwalu ogundji. Okwa ti aakwiilongo yamwe mbaka oya kwatwa po kAapolisi ya li ye li moshiponga oshinene.