Aapanguli yokathimbo yuulikwa ya longe mOmpangu yomOshakati

OMPANGU yOpombanda yomOshakati otayi ka yakulwa kaapanguli yatatu yopakathimbo uule womwedhi nguka naangoka taguya.

Aatokolihapu mbaka oya ulikwa opo ya kwathele okupulakena iihokolola, unene tuu omaindilo gokutalulula omatokolo gOmpangu ngoka inaaga manithwa natango. Aapanguli yopakathimbo mbaka oyo Theo Frank, Gerson Hinda na Patrick Kauta, yo mbaka otaya ka pulakena omaindilo genasha nomatokolo ga ningilwe miipotha yomiyonena omwedhi nguka. Omupanguli nale gwOmpangu yOpombanda, Theo Frank opamwe na Hinda otaya longo iilonga mbika ishewe, oshoka oya li ya ulikwa nale ongo aapanguli yokulipo mOmpangu yopombanda, omanga shika osho oshikando shotangpo sha Kauta okuulikwa ongo omupanguli gwopakathimbo mOmpangu yOpombanda. Hinda na Kauta oya ulikwa ongo aapanguli yokulipo okuza mesiku 1 lya Auguste sigo 15 ga Septemba nuumvo omanga Frank ota longo ongo omupanguli gwokulipo okuza mesiku 1 lya August sigo 31 lyomwedhi tuu nguka. Frank okwa li Omupanguli gwOmpangu yOpombanda okuza mu Maalitsa 1990 sigo omu January 1997 nokonima okwa shuna kiilonga yuunongompango ongo oshilyo sholutu lwaa nongompango ya Namibia. Okuza mpoka okwa kala ha ulikwa poompito odhindji okulonga ongo Omupanguli gwopakathimbo gwOmpangu yOpombanda. Hinda okwa longele ongo omupanguli gwokulipo gwOmpangu yOpombanda momumvo 2009 noshowo omumvo gwayi. Kauta okwa taambelwa miilonga yuunongompango moNamibia muApril 1997, konima yokumana eilongo lye lyuutseyiveta kiiputudhilo sha Durban-Westville noshowo shoka sha Natal moSouth Africa, hoka a likola oonkatu dho B Juris na LLB momimvo 1994 nomumvo 1997. Kauta okuli mehangano lyaanongompango lya Dr. Weder, Kauta na Hoveka.Pamushangwa gwa zi kombelewa yaamushanga gwOmpangu Yopombanda, ogwa ti aapanguli mbaka yatatu otaya ka pulakena nokutokola oohapu miipotha yili 78 yomiyonena, mbyoka yaningilwa omaindilo gokutalululwa. Ombelewa ndjika oya ti aantu mboka ya ninga omaindilo opo iipotha yawo yitalululwe nenge yena aantu yawo yeli mondholongo nayo yena iipotha ya indila yi talululwe ndele mbaka inaya tseyithilwa esiku kutya uunake iipotha yawo tayi pulakenwa, okwa tiwa naya kwatathane naamushanga gwopevi gwOmpangu yOpombanda mOshakati, kongodhi [065] 2236500.