Aapangi ya holola omadhiladhilo

OMATUNTILO gopashigwana gaanona kohi yomimvo ntano oge li metifa nonando aapangi yamwe mboka ye li iilyo yehangano lyaapangi, Namibia Nurses Union[Nanu] oya li ya tilitha kutya ota ya ka tinda okutuntila aanona.

Aapangi omathele iilyo ya Nanu oya li ya ningi ehololo lyomadhiladhilo omaandaha ya yi kombelewa yOshikondo shUundjolowele opo ando ya gandje ombapila ye nyenyeto kwaamushanga takalele, Kahijoro Kahuure.Ndele omupya omunene ina ye mwaadha mo mombelewa oshoka aniwa okwa li moshitopolwa shOmaheke. Metitano lya yi Kahuure okwa tile ye ita ka tsakaneka aapangi mboka kohi yewiliko lya Nanu, oshoka ehangano ndyoka ina li yalulwa ku holomende ongo ekalelipo lyaaniilonga. Kahuure okwa li woo eya lombwele kutya ota ya ka katukilwa onkatu ngele oya piyaganeke oshikonga shomatuntilo shoka sha thanekelwa oku longitha oodola oomiliona omulongo nane. Aapangi mbaka oya shuna komahala gawo giilonga yaana eyamukulo nenge inaa ya mona Kahuure. Amushanga gwa Nanu, Abner Shopati okwe ya hekeleke naambaka oya uvaneke taya ka shuna kiilonga metiyali, nokutuntila aanona nokulonga iinakugwanithwa yawo yilwe.Shopati okwa ti ota ya ka kutha ishewe esiku limwe opo ya ninge oshilage nOmuprima Minista , Nahas Angula. Omathimbo ga piti aapangi iilyo yoNanu oya ti oya vulwa eihumbato lyepangelo sho ta li tindi oku pulakena omakemo gawo kombinga yoondjambi. Oya li woo ya tilitha kutya Kahuure ngele ine ya pulakena yo ota ya ka tinda okutuntila aanona.