Aanyasha yoSwapo oya hala Sheya a ye

AANYASHA yoSwapo mOshitopolwa sha Hangwena mEtitano lya zi ko oya ningi ehololomadhilaadhilo moka taya pula Omukuluntusikola gwOseko yOpombanda ya Haimbili Haufiku Dineinge Sheya a kuthwe mo miilonga kEpangelo meendelelo ngashi tashi vulika.

Ngle aniwa shika inashi ningwa mshiwike shika, otaye ke shi ninga yoyene muule woshiwike shika nokuli, molwashoka aniwa a fala aanasikola yomOseko ye moka komaashinga yo RDP ya ningilwe mEenhana moka Osoondaha yeti 29 Maalitsa 2009.
Kakele komusamane Sheya, aanyasha yoSwapo moshitopolwa sha Hangwena otaya ti wo kutya nOmukuluntu gwOmuhandjo gwOseko ndjoka ya Haimbili Haufiku Hafeni Mwahafa naye wo na ze mo miilonga mOseko moka molwashoka oye wo naanaa a etha aanasikola ya ye komashinga yo RDP mOsoondaha ndjoka. Taya ti wo kutya, yo noshigwana shomOshitopolwa sha hangwena, oya kanitha einekelo mOmuwiliki gwElongo mOshitopolwa sha Hangwena noshowo maaendithi aakuluntu yElongo mOshitopolwa shoka ngashi Aatalelisikola, Aakuluntusikola noshowo aaleli yo NANTU yamwe moshitopolwa shoka noshowo Aanambelewa yamwe haya longo mIilonga yEpangelo moshitopolwa shoka notaya indile ya lishafwe meendelelo ngashi tashi vulika, ano ya lundululwe po pomahala gawo meendelelo ngashi tashi vulika.
Momukanda gwawo gwomanyenyeto ngoka ya pe Gavena yOshitopolwa sha Hangwena Usko Nghamwa, sha ningwa ku Amushanga gwEwawa lyAanyasha moSwapo Martha Helena Nakale, aanyasha yOswapo otaya ti ngeyi; yo ongAanyasha yOswapo oya simaneka aawiliki, aakuluntu yawo noshowo Ekotampango notaya tsikile noku shi ninga.
Ta ya ti ashike nee osha yela mo kutya aatondi ya Namibia a manguluka oye li taya longo omutenya nuusiku nelalakano lyokuyona po ombili ndjoka ya monika nuudhigu. Taya ti kutya yo noshigwana shomoshitopolwa sha Hangwena oya koneka nonkumwe onene Aanambelewa yElongo moshitopolwa shoka itaya longo we iilonga yawo nuuyuki ngashi ya tegelelwa ye shi ninge.
Taya ti kutya ngashi Sheya, okwa kala i inekelewa elongo lyaanona nokutala ngeno kutya mOsikola itamu ya iinima ya pamba oopolitika, ashike hasho ta gwanitha po, oku li ti itula miinima yoopolitika nokutula mo wo aanasikola, unene oku ya ukitha moRDP moka, moka ye mwene e l i oshilyo shuudha. Ta thiminikile aanasikola mOpaati ye moka, ngashi e shi ningi mOsoondaha yeti 29 Maalitsa 2009, sho e ya fala kOmaashina yo RDP ndjoka ya li mEenhana esiku ndyoka.
Aanyasha taya ti oya hala oku mu dhimbulukitha kutya aavali poya tuma aanona yawo kOsikola hoka ye ki ilonge ashike haku ka tulwa miinima yOopolotika. Taya ti okwa li ashike e na okulonga aanona iilongwa yawo ndele haku ya pa elongo lyokutonda Oswapo ngashi te shi ningi, unene olundji ha tumbula pwaamboka kaye shi yoRDP kutya, ‘Epangelo lyeni kali nna po sha’.
Aanyasha yOswapo taya ti kutya nonando pwa kala omapopyo gatya ngawo noga kala wo taga lopotwa, Elongo mOshitopolwa sha Hangwena, okuza kOmb elewa yOmuwiliki gwElongo, kAatalelisikola nokAakuluntusikola, kAakuluntu yIikondo inaku za ekumagidho lyasha molwashoka ayehe yOombelewa ndhoka oyo RDP.
Onkee, aanyasha mbaka taya ti, oya vulwa okwiidhidhimikila oshinima shoka noya tokola ya katuke oonkatu kuyo yene ngele itapu ningwa sha kEpangelo kombinga yAanambelewa mElongo itayi itha kwaashoka ya tulilwa miilonga. ‘
Ano, Aanyasha yo Swapo moshitopolwa sha Hangwena otaya indile kutya Omukuluntusikola gwOseko ya Haimbili Haufiku, Dineinge Sheya, nOmukuluntu wOmihandjo mOseko moka Hafeni Mwahafa, ya kale ya tidhwa mOseko moka nomiilonga meendelelo ngashi tashi vulika nange inashi ningwa muule woshiwike shika, otatu ke ya kutha mo kutse yene. Naya ze mo ya ye kOpolotika. Na ya ethe po iilonga yEpangelo lyOswapo,’ Aanyasha mbaka mombapila ya wo taya ti ngawo.
Aanyasha mbaka taya ti wo kutya Omutalelisikola mOshikandjosikola sha Hakafiy, omusamane Walter Ndakondja (Baakena), Omutalelisikola gwOshikandjosikola sha Ndobe, Likius Nakamwe, kumwe naakulukadhi yawo oye li aayambidhidhi yoRDP, nolundji kaya etha mboka kayeb shi yo RDP ya mone iilonga yUukuluntu wIikondo neneg Uukuluntusikola mIikandjosikola yawo. Itaya simaneke wo aaleli yomoshitopolwa, taya ti kutya oshitopolwa otashi lelwa kaantu inaya longwa.
Taya ti wo kutya aakuluntusikola yamwe moshitopowla sha Hangwena, ngashi unene Omukuluntusikola gwosikola ya Shikango Nehason Hangula, na Olga Shilomboleni ngoka aniwa e li Omunashipundi gwa NANTU mOhangwena, ohaya uhala taya popi nayi Epangelo lyo Swapo mOoradio moka, omanga aalongisikola yamwe haya thiminike aalongwa ya zale uumbindja wo RDP.
Taya ti kutya yo ongaanyasha yo Swapo noshigwana shomOhangwena osha vulwa nosha loloka komaihumbato ngaaka gaaniilonga mUuministeli wElongo mOshitopolwa sha Hangwena, okuza ngaa kOmbelewa yOmuwiliki gwElongo mOhangwena moka sigo okIikandjolongo hoka, notaya indile kEpangelo kutya ayehe mboka ya lundululwe po pomahala gawo meendelelo ngashi tashi vulika. Taya ti kutya aaniilonga ayehe mboka oya li ye na okukala ye shi kutya otaya longele Epangelo ;lyo Swapo na oya li ye na okukala ye hole Swapo nokwiigameka komautho ngoka taga tulwa po kEpangelo lyOswapo, nange nee nai ina ye shi hala, naya ze mo miilonga meendelelo ngashi tashi vulika. Aanyasha oya indila wo kEoangelo, li konaakone omalweendo gohauto yUuministeli wOmavi mOshitopolwa sha Hangwena, molwashoka aluhe oyi wetike piigongi yo RDP noshowo ndjoka yUuministeli wAanyasha noyUuministeli wIipindi nIikwafaabulika, omanga Osenda yyUuministeli wAanyasha mEenhana nayo wo hayi longithwa ongombelewa yo RDP na omo hamu kutilwa iilyo yo RDP moka.
Aanyasha yo Swapo taya ti wo kutya Aaniilonga yamwe mEpangelo ngashi Ndawedwa Mwandingi gwomElelo lyondoolopa yaEenhana noshwo Fillemon Shipanga na paulina Mangudu-Oyekole yomElelo lya Hangwena ohaya uhala taya tuku Epangelo lyOswapo nonande omo haya longele. ‘Zeni mo mEpangelo lyo Swapo ndele tamu ka longela opolitika.’