Aanyasha yo Swapo naya popye oshili: RDP

AANYASHA yo RDP otaya indile Aanyasha yOswapo moshitopolwa sha Hangwena ya popye oshili nokugandja uumbangi wiihwapo kutya Omukuluntusikola gwOseko yOpombanda ya Haimbili Haufiku, omusamane Dineinge Sheya okwa li shili a humbata mo aanona yOsikola ye noku ya fala komaashinga yoRDP ndjoka ya li mEenhana moka meti 29 Maalitsa 2009.

Aanyasha yoSwapo moshitopolwa sha Hangwena meti 3 Apilili 2009 oya maashingile mEenhana nokugandja omukanda gwawo gwomanyenyeto ku Gavena yoshitopolwa sha Hangwena nokOmbelewa yElongo mOshitopolwa sha Hangwena moka taya nyenyeta kutya Omukuluntusikola gwOseko yOpombanda ya Haimbili Haufiku tate Dineinge Sheya meti 29 Maalitsa 2009 okwa li a humbata mo aanasikola yomOseko ye moka nohauto ye noku ya fala komaashinga yo RDP ndjoka ya li mEenhana esiku ndyoka.
Taya popi wo kutya yo oya limbililwa Ombelewa yOmuwiliki gwElongo mOshitopolwa sha Hangwena, ye yi tala ko kutya otayi wilikwa kAanambelewa ye li moRDP. Taya tumbula wo Aataleli yOosikola yamwe, Aakuluntusikola yamwe noshowo aalongisikola yamwe yomoshitopolwa sha Hangwena, nAanambelelwa mOmuministeli n gamwe noshowo mElelo lya Hangwena kutya oye li nayo mo RDP omanga taya longo mEpangelo lyoSwapo.
Aanyasha yo RDP, pa mukanda gwawo ngoka gwa leshwa kOmupeha Amushanga gwo RDP gwOpashigwana Sam Hamunyela pethimbo lyomaashinga yawo ndjoka ya li mEenhana moka mOsoondaha ya zi ko yeti 12 Apilili 2009, otaya ti kutya oya halukithwa nokukankwa komapopyolundilo ngoka notaya indile nee aanyasha yoSwapo ya gandje uumbangi nuuyelele wiihwapo miinima mbyoka taya popi.
Taya gandja wo uusama ku Kaansela gwOshikandjohogololo sha Eenhana tate Nehemia Haufiku kutya oye a li e li omaashinga yAanyasha yoSwapo konima, nedhilaadhilo alihe ndyoka lya shangwa momukunda gwAanyasha yoSwapo nogwa leshwa ku Amushanga gwAanyasha yo Swapo mOshitopolwa sha Hangwena me Martha Helena Nakale, ngoka wo e gu pe Gavena Nghaamwa nOmbelewa yElongo mOhangwena, oye e li pa aanyasha yoSwapo mbaka, molwashoka okwa adhika e shi popya nale mOradio yOshiwambo mOprograma ya Lungada, kuyele oshiwike shoka sha zi ko, moka a li a ithna Ookaansela adhihe dhomoshitopolwa nodhomuushiinda kumwe niilyo naayambidhidhi yoSwapo ayehe yee ye ya waimine mehololomadhilaadhilo enene mEenhana li li ompinge nOmukuluntusikola Sheya sho ta fala aanasikola kiigongi nokoomaashinga dho RDP mEenhana.
Hamunyela ta ti Swapo oha popi ti ipilukile po ye mwene, molwashoka, manga ta ti aanona inaya longithwa miinima yOopolotika, ye pethimbo olyo tuu ndjoka momaashinga ye omu na aanona yOsikola te ya maashingitha.
‘Ano oshi li ashike oshiwanawa, ngele oye te wu maashingitha nenge te wu fala kiigongi ye, omanga ngele tawu yi kiigongi yOongundu dhilwe kashi li mondjila? Swapo okwa itaala tuu ano mUudemokoli nomoshilongo tashi lelwa kOongundu odhindji dhOpolotika, nenge ine shi itaala? Okwa itaala wo tuu mEkotampango lyoshilongo? Hamunyela ta pula ngawo nokulombwela Swapo kutya ina dhimbwa kutya sho mOngundu ye e na mo Uupionia, moongundu oonkwawo itamu vulu wo namo okukala Uupionia wOongundu ndhoka. Hamunyela ta ti Namibia ota pangelwa paudemokoli, moka Aanamibia ya pewa uuthemba wokukala moongundu dhOopolotika moka ya hala yo wo ya kale taya ende ya manguluka nokuninga Oopolotika dhawo ya manguluka.
Ta indile kAakwaSwapo ya ethe po okuuhala taya tuko aaleli naawiliki yo RDP, noku ya luka omadhina gi ili nogi ili. Ta ti yo moRDP oya simaneka aakuluntu na kaya gtuka aakuluntu naawiliki yoongundu dhilwe, ngashi mboka yoSwapo taye shi ningi.
Hamunyela ta ti ngele yoSwapo mOhangwena kaye uvite ko Ekotampango, na pamwe kaye shi oku li lesha melakaamoka li li naye ya ithane ye li ya tolokele mo.Kombinga yAanyasha yoSwapo ye li ompinge nAanambelewa yElongo nosho tuu moshitopowla sha Hangwena, taya ti ye li mo RDP omanga taya longo mEpangelo lyoSwapo, Hamunyela okwa ti kutya moNamibia kamu na Epangelo lyAakwaswapo oyo ayeke, omu na Epangelo lyaantu ayehe, kutya nee oku li moSwapo nenge oku li mOongundu dhilwe.
Kamu na wo Oshikondo shaaniilonga yEpangelo yOswapo ashike, omu na Oshikondo shAaniilong amEpangelo ayehe moNamibia, kutya nee oye li mOswapo nenge kaye mo. gOtandi nindile Aakwaswapo, ya ethe po okuningila AakwaRDP noyOongundu dhilwe omaitilitho nomambandameko.
Hamunyela ta indile kAanyasha yo Swapo noku Kaansela Haufiku, ya gandje ombili meendelelo ngashi tashi vulika kOmbelewa yElongo mOhangwena noshowo kAatalelisikola Walter Ndakondja, na Likius Nakamwe, kOmukuluntusikola gwOsikola ya Shikango tate Nahason Hangula, kOmukuluntusikola me Olga Shilomboleni nokwaayehe mboka ya tumbulile omadhina gawo momukunda gwawo gweti 3 Apilili 2009 noshowo kwaayehe ya tuka omathimbo ga zi ko.
‘Swapo okwa etha nale oshitopowla shika sha Hangwena shi kale sha faila miinima oyindji yopahumokomeho nosho tuu, molwaashoka okwa tula aantu mUuleli nomOondondo dhUuleli wopombanda mboka ye na uulema melongo, nomuntu oto kumwa nee sho a hala okutidha miilonga aantu yetu mboka ye na Elongo, uunongo neshiwo li li pombanda notaya enditha nawa Elongo lyaanona mOshitopolwa, ngashi unene omusamane Sheya ngoka ya hala oku tidhaatidha, omanga oye naa naa e na ewiliko ewanawa mOsikola ye noku na Osikola hayi piti kamana moshitopolwa sha Hanagwena nomoshilongo ashihe.
‘Oya hala ye mu kuthe po opo osikola yi faile nenge ongiini ano?
Hamunyela ta pula ngawo momukanda gwawo wo moka ongAanyasha yoRDP. Ta ti Swapo okwa ngwangwana, nosha yela kutya okuza tuu nuumvo ndjika, Swapo itaka kala we Swapo ngashi a kala nale. Ta ti, Swapo ote kiinyengithwa nokundjungwaandjukwa koRDP.
Hamunyela ta ti, Swapo pethimbo ndika, okwa tila noonkondo RDP nota ningi iinima e li mombepo yengwangwano enene lela. gOnda hala okulombwela Oohailwa yandje aakulu mOswapo kutya ethimbo olya pya, lya pila elunduluko nEpangelo epe, li li mewiliko lyo RDP. Esindano omvula ndjika olyetu, oohailwa, natu yeni ashike ndele tatu ka hogololeni oRDP, molwashoka ngele tu lyeni kumwe otatu shi enditheni hwepo. Natu kaleni kumwe ongAanamibia noshigwana shimwe. Aanyasha yoSwapo kaye shi aatondi yetu, ashike oye li aakondjithi yetu mOpolotika, h Hamunyela ta ti.