Aanuulema taya tidhwa mo mOshipangelo

AANUULEMA yokuutemba ye li 21 lwaampoka mboka ya kala mOshipangelo shEpangelo sha Shakati ethimbo ele lela noya li ya tala kutya Oshipangelo osho egumbo lyawo monkalamwenyo yawo, omasiku ga zi ko oya lombwelwa ya thige po Oshipangelo shoka noya shune komagumbo gawo hoka ya zile kIitopolwa yi ili noyi ili moshilongo.

Kutya oya tidhilwa mo shike, otaya ti kutya kaye shi kutya oya tidhilwa mo shike nonkee ye li taya pula kaakuluntu yOshipangelo shEpangelo sha Shakati kutya omolwashike taya tidhwa mo moshipangelo moka yab kala ethimbo ele lela noya li ya tala kutya omo megumbo lyawo monkalamwenyo yawo moka.
Omupopiliko gwawo Frans Paulus, ota ti kutya mu Desemba omvula ya zi ko 2008 oya li ya adhika kAanambelewa yamwe okuzilila kOmbelewa yOzulonkalo mOshipangelo moka, taye ya pulaapula omapulo noku ya konaakona. Okuza mpoka oya lombwelwa kutya oye na okukaza mo mOshipangelo esiku limwe nokuya komagumbo komikunda nokIitopolwa yawo naamboka itaya vulu okuya komagumbo, ya pumbwa esiloshimpwiyu lyoshipangelo oye na okuya kIipangelo nokOoklinika dhokIitopolwa yawo.
Frans Paulus ota ti kutya oya shangela Omukuluntu gwOshipangelo shEpangelo sha Shakati Omundohotola Shannon Kakungulu ombapila yomanyenyeto gawo ndjoka ya tumina wo kOmupresidende Hifikepunye Pohamba noshowo kOmukokolipresidende Omundohotola Sam Nujoma, kOminista yUukalinawa nOnkalonawa Omundohotola Richard Kamwi noshowo nee kOmuwiliki gwUuhaku mOshitopolwa sha Shana Omundohotola Naftali Hamata moka ye ya lombwela omaudhigu gawo.
Ta ti kutya oya shanga mo taya nyenyeta kutya edhilaadhiloo lyoku ya tidha mo mOshipangelo sha Shakati kali li pauyuki nande, oshoka kaye na mpoka taya ka vula okukala pu li hwepo mwa fa moshipan gelo shEpangelo sha Shakati. Taya ti oyendji yomuyo ye li kuutemba ya zile kiitopolwa ngashi kOhangwena ku na omafuloulu, itaya vulu okwiinyenga noya pumbwa lela ewathelo enene ndyoka itaya ka vula okumona komikunda dhawo hoka ngele oya yi ko.
Yamwe wo, kwati naya ye komagumbo, kayi inyenga na kaya za ko koombete,oye na iilalo moonto nosho tuu, ye na oombinzi dha londa, yamwe yomuyo kaye shi kwiinyenga, okwiiyoga yoyene nokwiiwatela yoyene pwaa na ngoka te ya kwathele. Onkee omukanda nguka tagu ti, okutuma aantu mbaka komagumbo ano komikunda dhawo kashi li pauntu nande, oku ya monitha ashike iihuna, oku ya taagulukitha ashike omuhuya ya ka lyate eyoka.
Taya ti okuya komikunda oku ya hepeka ashike pamikalo dhi ili nodhi ili, oshoka kokuma hoka kaku na nande ehungomwenyo noshowo omautholutu giihwapo ngashi ngoka taga monika moshipangelo sha Shakati. Kaku na omeya ga yela,kaku na iiyenditho, etonatelo lyopaunamiti, uundjugo wokwiikwathela tau opalele aanuulema noshowo okwaa dha komahala gomayakulilo komuntu e li mokatemba. mOmbapila moka taya indile kEwiliko lyoshipangelo shEpangelo sha Shakati li talulule etokolo lyalyo ndyoka.
Taya ti kutya etidho lyawo mOshipangelo moka kali shi epe, oya kala taya tidhwa mo kwali iikando ya thika nokuli pu itatu lwaampoka, ashike aluhe etidho lyawo olya kalekwa omolu omatompelo ga tumbulwa metetekelo. Taya ti kutya yamwe yomuyo, ngashi Frans Paulus ye mwene omudhani momaudhano ogendji haga dhanwa kaanuulema moshilongo omanga yamwe aanasikola.
Ngele nee oya yi komagumbo otaya ka dhana peni nonoolye nenge otaya ka sikola peni?mOmbalila yawo moka otaya pula kutya nani aanuulema moNamibia ina ya halika mo nenge ongiini ano taya ningwa nayi ngeyi? Taya ti ngele etidho mo lyawo olya tsikile nena otaya ka ninga ehololomadhilaadhilo enened notaya ka lombwela uuyuni oshinima shoka, yo taya ka indila aantu ye na omaulema meni nopondje yoshilongo yee ye ya yambidhidhe. Otaya ti kutya = ngele Oshipangelo sha Shakati otashi ya monene ehala liumwe li li nawa pondje ya sho mOshakati, nena kaye na uudhigu wokuza mo.
Sho a monika kOshifo shika, Omukuluntu gwOshipangelo shEpangelo sha Shakati Omundohotola Kakungulu, okwa ti Oshifo nashi ka mone Omundohotola Hamata. Omundohotola Hamata, okwa koleke kutya opu na shili oshinima shatya ngawo shokulombwela aanuulema mboka itaya ehama, ya ye komagumbo molwashoka moshipangelo kamu na we ehala lya gwana.
Ta ti Oshipangelo oshiipyakidhila nokutungulula Oosala nosho tuu molwashoka oya pumbwa omahala gaanuuvu mboka taya ehama notaya taambwa moshipangelo moka.