Aantu ayehe oye na okutalwa: Ithana tati

ONGUNDU yo Swapo oya ti kutya oya haluka komaihumbayonayi gaanona yoonakulwa aakulu (mboka ye li poombelewa dhopaati moshitopolwa sha Shan, sho ya li ya ya kelele iiyenditho naantu yokolupadhi pontopa ya Kandjegedi kaye pite po.

Oshinima shika osha li nee she ya umbitha kOpolisi noohasa dholwithi lwomahodhi. Amushanga-Ndjayi gwo Swapo, meme Pendukeni Iivula-Ithana okwa ti Opolitiburo yoSwapo oya li ya kundathana oshinima shika na kayi li nande ya nyanyukilwa omaihumbato gaanona mbaka.
‘Omaihumbato ngaka inaga pumbiwa nande molwashoka omaudhigu gawo otaga kundathanwa pamwe naangoka ge niwe kaagundjuka ayehe mu Namibia,’ Iivula-Ithana osho a popi ngaaka.
Okwa ti Epangelo otali ungungauna nokweeta po ooproyeka dhokugandja iilonga kaagundjuka yAanamibia ayehe na aanona yoonakulwa aakulu oye na oku shi zimine kutya nayo oya kwatelwa mo.
‘Aantu yamwe mboka kaya li kombanda taya mono wo iihuna.
Otu shi aantu 200 ya li ya umbilwa mefuta ye na omwenyo na aanona yawo otu ye na. Itashi vulik ku kale nOkategori kosipesiala kaantu yongundu yimwe,’ Ithana ta popi ngaaka.
Aanona yamwe yoonakulwa aakulu oye li wo ya dhika ootenda dhawo pOombelewa oonene dhoSwapo mOvenduka. Mongunda yaanona mboka omu na uunona naakiintu ye na omategelelo.
Meti: 1 lyomwedhi nguka, aanona mbakaya zi pOmbelewa onene yoSwapo moshitopolwa sha Shana pu Kandjengedi mOshakati mpoka ya kala uule womasiku ga zi ko taya ti kutya itaya zi po manga inaya pewa iilonga nokuya pokati kontopa ya Kandjengedi, taya ti kutya oya hala okumona Omupresidende Hifikepumnye Pohamba e ye e ya popothe momukundu gwawo nguka gwokwaana iilonga.
Sho ya kala mpoka osha eta iiyenditho naantu yokolupadhi mboka ya kala ya hala okupita mpoka okuya nokuza kOshakati ya kale itaya vulu okupita po. Oombesa niihauto mbyoka ya zilile kOndangwa noshowo kOshikango nokuushimba naambyoka ya kala tayi zi kOshakati ya thinda ngeno kOngwediva noshowo kOndangwa kOshikango, kuushimba nokIitopolwa yilwe oya kala momikweyo omileeleka kombinga yokuuninginino nokuuzilo wontopa ndjoka.
Opolisi nayo oya kala ya kalela ontopa ndjoka ya kuthwa ko kaanona mbaka noya kala taya pula ya ninge oonkundathana nayo ya uvathane nayo pambili ya ze po pontopa mpoka noya ethe iihauto naantu yokoompadhi ya pite po nombili nokuya hoka taya ya nomaipyakidhilo gawo.
Aanona oya dhama mpoka kutya yo itaya zi po manga Omupresidende Pohamba ine ya po e ya popithe noye mu pe uudhigu wawo wokwaana iilonga na nkene taya ningwa nayi nokuliwa oshipungo kwaamboka taya kutu aanona yoonakulwa aakulu miilonga, unene ngashi moshitopolwa shEtanga lyEgameno nosho tuu.
Osha fa nee sha li ngawo kutya vOmupresidende Pohamba , ngoka esiku ndyoka a popitha engathithi pOhangwena mEsiku lyAaniilonga, ka li ta vulu okuya ku yo e ya popithe nenge a ninge oonkundathana nayo moshinima shoka shokwaaniilonga kwawo.
Aanona oya kala nee taya ti kutya yo pontopa mpoka itaya zi po nande manga Omupresidende ine ya ya kundathane naye moshinima shoka.
Ayehe omo ya li mongundu yawo moka pontopa mpoka ya dhama oonyala mevi kutya itaya zi po kutya naya ningwe ngiini. Taya ti oya tokola okusila oshili shawo shokwaana iilonga noye na okukondja sigo taya mono iilonga, kutya nee otashi yab pula etiko lyombinzi.
Manga ngaa ye li pokati kontopa mpoka, Opolisi oya btameke okugandja omakumagidho kutya naya ze po noku ya pa ethimbo lya ngambekwa.
Nande ongawo oya ti itaya zi po. Opolisi yOsipeya mewiliko lya Chief Inspekta Karl Throne, oya umbile oogaasa dholwithi lwomahodhi mokati kawo pokati kontopa ya Kandjengedi mpoka naanona oya tameka taya matuka, taya punduka nokugwila po, ya thinda kOmbelewa yoSwapo pu Kandjengedi mpoka ya kala noya za sho ye ya okukutha ko ontopa ndjoka.