Aantu 13 ya hulitha sho ya li oshithima shohefe moKavango

Omukwatanithi gomakonakono giimbuluma, omupevikomufala Bonifatius Kanyetu okwa popi kutya aantu 13 oya mana oondjenda sho taku fekelwa kutya iikulya mbyoka ya li oyi na ohefe, sha ningilwa momukunda Kayova moshitopolwa shaKavango Uuzilo.


Aantu yomegumbo limwe ye li 18 otaku hokololwa mOlyomakaya ya li oshithima shuusila wehete lyomundevere nolwanima oya kwatwa kuuwehame shoka she eta yamwe ya hulithe.


Kanyetu okwa koleke oshiningwanima shoka konzonkundaneki ndjika nokwa popi kutya opolisi okwa li ya tumine osheendo kegumbo ndyoka opo yi ninge omakonakono gosheetithi shomaso ngoka.


“Aantu yetu natango oye li momudhingoloko gwaNiyona nogwaNyangana. Otatu ke mu tseyithila oshizemo,” osho a popi ngaaka.


Pauyelele wa thiki momake gonzonkundaneki ndjika, aantu 18 okwa li ya falwa meendelelo koshipangelo shaNyangana mOlyomakaya konima sho ya li oshithima, moka yatatu ya hulitha omolwohefa.


Yatatu oya hulitha konima owala sho ya thikithwa moshipangelo shaRundu, omanga gumwe okwa hulitha mOsoondaha.


Aantu mboka ya hupu po oya taambelwa moombete, moka gumwe gomuyo kwa li a lalekwa ashike lwanima okwa shunwa moombete notaku hokololwa kutya okuli monkalo tayi nuwa omeya.


Ashike uuyelele wa holokele po ohela, owa popi kutya aantu yahamano mboka ya li moombete nayo oya mana oondjenda, omanga gumwe okwa li mokoma pethimbo uuyelele wa thiki momake gonzonkundaneki ndjika. Shoka oshe eta omwaalu gwaakwanezimo mboka gu londe okuya paantu 13.


Otaku hokololwa kutya oonakuninga oshihakanwa okwa li ya ka teya omanenge komulonga, ngoka ya longitha mokutsa uusila mboka.
Okuza mpoka uusila mboka owo nee ya longitha okutekela oshithima shoka ya li.


“Otwa tega natango oshizemo shetando lyomidhimba opo ku tseyike kutya osheetithi shomaso oshike,” osho kansela gwoshikandjohogololo shaNdiyona, Laurentius Mukoya, a popi ngaaka.


Okwa popi kutya oshiningwanima shoka “otashi uvitha nayi” nuunene ooshoka kutya oonakuninga oshihakanwa oya za megumbo limwe.


Mukoya okwa popi kutya aakalimo yomoshikandjohogololo shawo otaya nana nondatu omolwoshikukuta momudhingoloko gwawo.


“Ohaya kongo iikulya yuukila komahangu mbyoka taya vulu okulya,” osho a popi ngaaka.


Omukuluntu gwoshikondo shuundjolowele ta kwathele moshitopolwa shaKavango Uuzilo, Woitha Kapumburu, okwa popi tati: “ Uuministili owi ipyakidhila nokulongekidha olopota ndjoka yi na uuyelele awuhe, notayi ka tseyitha wo noomvula dhawo.”

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News