Aanona yoonakulwa ya geela Pendukeni

NONANDO pokati mpoka pwa pita iinima oyindji ya tumbulilwa aanona yoonakulwa aakulu yOswapo mboka ye li ya yonga oontanda dhawo pOombelewa dhoSwapo, mboka yopontanda ndjoka yi li pOombelewa dhoSwapo pu Kandjengedi mOshakati mOshitopolwa sha Shana, oye li ya geela Amushangandjayi gwoSwapo me Pendukeni Ivula-Iithana kombinga yoshipopiwa she e shi popile aniwa petameko lyOmwedhi gwa zi ko nosha holokele mOshifo shika sheti 13 Mei 2009.

Meme Iivula-Iithana okwa tila aniwa kutya aanona yavalelwa mekondjelomanguluko lya Namibia kaye li osipesiala noshowo kutya Swapo okwa halulwa kwaashoka tashi popiwa kaanona mbaka shi na sha nombinga yIigwanahangana moshinima shegandjo lyiilonga niimaliwa noshowo kombinga yepato lyontopa ya Kandjengedi kwali kaanona mbaka ongula yeti 2 Mei 2009.
Taya ti wo kutya Amushangandjayi gwoSwapo me Ivula-Iithana okwa ti wo kutya Ongundumutima yoSwapo inayi fuulwa koonkatu ndhoka dha katukilwe kaanona yEkondjelomanguluko. Aanona otaya pula nee kutya meme Ivula-Iithana, oohapu ndhoka a popi ookwe dhi popi paye mwene nenge okwe dhi popi pehala lyOngundumutima nEpangelo?
‘Ehokololo ndyoka a ninga kali shi nande ehokololo li li nawa,’ aanona yomekondjelomanguluko mbaka taya ti ngawo nokugwedha po kutya meme Ivula-Iithana ongomuleli oku na okukala e shi kutya oshike tashi vulu okukandula po thiluthilu omukundu nguka gwaanona ya valelwa mekondjelomanguluko mboka oyendji yomuyo ye li oothigwa nokuli, na haku endelela kutya oya puka sho ya katuka onkatu yatya ngawo.
‘Soka sha ningwa po, ano ooonkatu ndhoka dha katukwa po kaanona yomekondjelomanguluko, oye dhi katuka molwashoka Swapo a faila okuyamukula komaindilo gawo,’ taya ti ngawo nokutsikila ko kutya ngele Swapo okwa yamukulile nziya ngenongeno inapu katukwa oonkatu dha fa ndhoka.
‘Oshi li oshinakugwanithwa shoSwapo okukandula po omaudhigu getu nombili, ihe haku eta po omikalo tadhi ende kashona owina mokukandula po omukundu gwetu nokulongitha Opolotika moshinima shika,’ aanona taya ti ngawo nokugwedha po kutya yo ongaanona ya valelwa mekondjelomanguluko kaye na sha nokutya aniw angeno yo oye li osipesiala, ihe otaya kondjele ashike uuthemba wawo ngashi wa ndjandjukununwa mEkotampango lya Namibia.
Taya ti muule woomvula adhihe ndhika Namibia a manguluka, oya kala nokumona iihuna noya kala omathimo ogendji taya yi kEpangelo lyoSwapo nomaudhigu gawo ngaka, ihe inaya yamukulwa sha shomupondo. ‘Tse aanona yoonakulwa aakulu otwa valelwe methimbo ethigu lyekondjelomanguluko. Twa kanithila aavali yetu miita yekondjelomanguluko, omanga yamwe yomutse hela twa valwa tu mone aakuluntu yetu, ano twa adha ya sa nale miita yekondjelomanguluko.
Ngashi tu li ngeyi otu li monkalo onhigu yengwangwano momitse nomoondunge dhetu moka omolu onkalo ndjika yuuthigwa uunene,’ taya ti ngawo nokugwedha ko kutya nonando ye na nale omaudhigu gawo ngoka ngashiingeyi kwa gwedhwa nee kwaangoka taya ningilwa gomatilitho, gokukala moshipala shoka taya indile shuuthemba =
wawo noshowo okweehamekwa komalutu kwaamboka oyo ya li ye na oku ya longela uuwanawa ngashi mboka taya pula, molwashoka oyo ya li aawiliki naakomeho yekondjelomanguluko lya Namibia. Aavali yetu oya sila momalugodhi, taya kondjele emanguluko lyoshilongo shetu shika, opo tu kale tu na onakuyiwa yi li nawa kutseni atuheni, ihe konena ndjika hasho, otu li tatu ningwa nayi nokuyakulwa twa fa oombwa kaawiliki yetu nokaantu yetu nonande ye shi nawa onkalo yetu sho yi li.
‘Tse otatu pula ashike tu pewe iilonga, elongo nekwatho lyopashimaliwa opo tu vule okweenditha oongeshefa nenge Ooprojeka dhetu. Opu na yamwe mboka taye tu pe oombedhi kutya omolwashike inatu ilonga nenge omolwashike twa etha po oosikola. Shika otw ahala tu shi yamukule ngeyi kutya tangotango sho twa za kombanda nokuya moNamibia onkalo nomudhingoloko oya li iipe kutse.
Kasha li oshipu kutse okwiigilila mokati koshigwana oshikwetu, molwashoka inatu tulululwa nawa kwali ngashi sha li shi na okukala nenge okuningwa. Inatu hungwa omwenyo nawa ngashi sha li shi na okuningwa na
inatu unganekwa nawa kwali nokuuvithwa ko nawa ombepo yedhiminathanepo. Otwa ekelwa ashike mowala, mombuga moka yomilaulu. Inatu mona eputudho lyohole, ngeno ngashi omuntu wu na ho na nyoko kwali, omanga onkalo yoshimaliwa kumwe nofuto yElongo ya kala yi na ondilo moNamibia notwa kala itatu yi vulu molwashoka tse katu na oshimaliwa, katu na aavali mboka ngeno ya li ye na okukala taye tu yakula noku tu kandulila po oompumbwe dhetu ndhika dhesiku kehe. Onkee nee tse otwa tokola okuya ku
meme, ku tate gwetu Swapo, moka omo mwiiyambela nomwa sila aavali, aakuluntu yetu, tu pule uuthemba wetu. Aanyasha yamwe yomoshilongo nayo otaya vulu okupula omauthemba gawo, ‘ aanona mbaka taya ti ngawo.
Oya tsikile ko kutya yo itaye ya kelele ya pue momauthemba gawo. Taya ti oshikumungu shawo oshi ili noshi na okukandulw apo meendelelo ngashi tashi vulika. Taya ti nokupula kutya, meme Ivula-Iithana naye oku na aanona, ihe omolwashike kaye mo mongundu yawo? Taya ti me Ivula-Iithana, ongomuvali okwa li e na okukala e uvite uudhigu pamwe nayo, aanona oothigwa naamboka ye li moluhepo olunene, mboka aavali naakuluntu yawo ye na ombinzi tayi tekele nokutalaleka aluhe emanguluko lya Namibia pethimbo ndika.