Aanona yoonakulwa aakulu nAaMix yi idhenga mumwe

OMAMANYA oga li gu umbwathana manga Opolisi yi ithanwe yi ye yi kwathele, sho aakalimo yomolukanda lwa Mix (pondje ya Venduka) yi idhenge mumwe naanona yoonakulwa aakulu mboka haya zi pofaalama yo Swapo omutenya gwOsoondaha.

Aakalimo yamwe yopu Mix oya lombwele The Namibian kutya aanona yoonakulwa aakulu oya kala nokwiihumbata nayi konima ashike sho ye ya pofaalama mu Novemba gwomumvo gwa zi ko. Pofaalama ndjika oya li ya falwa ko kEwawa lyAagundjuka mo Swapo, opo ku yandwe ekwatopo lyawo konima sho ya li ya tindi okwiiyutha kelombwelo kutya pomatungo gOombelewa dhOonakulwa aakulu mOvenduka mpoka ya li ya ningi omasiku 80 naya ze po.
AaMix oya popi kutya aanona yoonakulwa aakuli ohaye ya kolukanda lwawo omathimbo nomathimbo, hoka haye ya ithana wo piimbale uunona taya li.
‘Molwashoka tse aantu atuhe, inatu hala ya se ondjala,’ Festus Shukulu osho a popi ngaaka. Ihe aniwa omutenya gwOsoondaha, aanona mbaka oya li ya ye mu umbu nomamanya noku mu dhenga.
‘Oya li taya ti kutya ondi na ondjembo, ihe tala ndje – ngame ohepele na kandi na – kandi na ondjembo na kandi na oshimaliwa shokuyi landa,’ Shikulu ta popi.
AaMix otaya ti wo kutya aanona mbaka ohaye ya yugu iinima yawo na ohaya kala taya eta omapiyagano pu Mix. ‘Oha ye tu yugu noku tu dhenga na uuna twa hala okwiithana Opolisi, ohaya popi kutya yo aanona yo Swapo na otaya vulu okuninga kehe shoka ya hala,’ omukalimo gumwe po Mix ta popi ngaaka. Nande ongaaka, aanona mbaka oya li ya yi kokule sho ya dhenge Shikulu.
‘Otwi ithana Opolisi molwashoka ngashiingeyi otwe ya vulwa na inatu hala we okukala noombotsotso,’ omukalimo gumwe ta tsikile ko ngaaka.
Sho Opolisi ya thiki, AaMix oya li nee ya indile Opolisi ya fale aanona mbaka kofaalama yawo na yamwe yomuyo oya li ye ya lamba, opo ya kale ya tala kutya ayehe oya ya meni.
Ihe pomweelo gwofaalama ndjika, yamwe yomaanona mbaka oya li ya tindi okuya mo na AaMix oya li ya toola omamanya, shoka sha ka ete nee kehe gumwe a kale a homata.
Nande ongaaka, Opolisi oye ya yi pokati.
Ihe konima yethimbo, aanona yoonakulwa aakulu ayehe oya li ya gandja omake e taa yi meni lyofaalama. Gumwe gwomaanoa mbaka okwa ti omulumentu gumwe gwopoMix oku na okakadhona mofaalama yawo na okwa kala nokuya piyaganeka okuza momasiku 26 Febuluali.
Omulumentu nguka ohe ya aniwa mofaalama yawo ta ningile omatilitho mboka ye li motenda yimwe nomukadhona gwe. Shika osho nee aniwa she eta petokolo lyokudhenga omulumentu nguka.