Aanona yomekondjo pondje yoBerg Aukas

KONYALA aanona 23 yavalelwa mekondjelomanguluko oya unga ontanda pondje yofaalama yopoBerg Aukas ta ya indile opo ya ethelwe meni.

Ofaalama ndjika oyo ngashingeyi egumbo kaanona yomekondjo ye li 540 mboka ya li ya lundululilwa mpoka konyala iiwike iya li ya piti.Aanona mbaka 23 oya li aniwa oshitopolwa shaanona mboka ya li ya kala poontanda dhawo poombelewa dhoSwapo moshilongo ashihe omathimbo ga piti.Ota ku tiwa aanona mbaka oya thigwa po molwa omatompelo gontumba nogongandi pethimbo yakwawo ya kuthwa pomahala mpoka.Ota ku tiwa yamwe oya adhika ya zapo poombelewa dhoSwapo, nenge yamwe oya tindwa kaawiliki yawo, mboka ye ya pe ombedhi kutya yo oya li inaa itula mo moshikondjelwa shawo.Ongundu yomi 23 oya za moVenduka nOtjiwarongo, oya yi yoyene koBerg Aukas, konima sho epangelo inaa li vula okuya fala kofaalama ndjoka.Sho aanona mbaka ya thiki pofaalama mpaka oya ti aniwa oya keelelwa kiilyo yetanga lyegameno kaa ya yemo meni lyolugumbo lwofaalama. Aanona oya lombwelwa kutya ehala ndika olya kalekelwa aanona yepangelo.Aanona mbaka sho inaa ya pitikwa ya yemo mofaalama oya tokola oku unga ontanda yawo pondje popepi nomweelo gwokuyamo, kaa ye li kokule nooyakwawo mboka yeli mootenda handiyaka yolugumbo.Gumwe gwaanona mbaka Lydia Vilho okwa ti pethimbo ya thiki mpoka ooya kwawo mboka ye li meni oya li ha ye, ya puyo noku ya etela iikulya nomeya.Ndele shika aniwa ngashingeyi osha hula po konima aniwa sho aakwiita mboka taya tonatele ehala ndika ya lombwele ookuume kawo ya hulithe shika.Ongundu ndjika ngashingeyi oya tula kumwe oshimaliwa shoka ya li yina nokulanda uusila opo ya kale ta ya itelekele oshithima puuyelele mpoka yeli.Oya ti ohaya ka teka omeya oshinano shookilometa ndatu, omanga pena omandoloma gomeya meni lyofaalama oometa ashike dhontumba okuza mpoka yeli.Omashongo gamwe ngoka ya taalela ogo ngaashi omayoka, oondje nontsi unene ndjoka ha yi etwa kiiyenditho mbyoka ha yi ende mpoka.Vilho okwa ti nonando ongeyi yo opo ta ya kala mpaka sigo uuna ndoka ya pitikwa ya ye meni lyofaalama.Okwa ti epangelo aniwa ita li ya yakula shithike pamwe. Yo oya hala ashike ya kwathelwe shi thike pwaashoka sha ningilwa mbaka ye li mofaalama nale.Vilho ta ti.Oshilyo shimwe shongundu ndjika, Rheinhold Shindondola okwa ti: ‘Tse ota tu talika ongo inatu za muupongekwa.Okutya ota tu ningwa twa fa oombwa.Ina ya hala ooya kwetu ya popye natse nenge ye tu kwathele.Uuna ye ya kombinga ndjika yolugumbo aakwiita oha ye ya tidha po.Otwa kumwa kutya otwa ninga shike mbela opo tu ningilwe shika’.Okwa ti yamwe yomwaambaka 23 oye na aamwayina yeli meni lyofaalama.’Tse ota tu indile tu pitikwe tu ye meni ku yakwetu.Omolwashike tu na okuhepa otse atuke ngele na ni otwa li twa hepa pamwe nale.Omolwashike ta ya kambadhala okututopola? Shindondola ta pula.Pethimbo othe Namibian ya talelepo ofaalama ndjika, omukwiita ngoka e na oshinakugwanithwa shoku tonatela ehala okwa tindi okugandja epitikilo opo tu ye meni, nonando opena aakwiita ta ye tu kwatele komeho.’Ongame ndili mewiliko mpaka na ondi na okukalapo ngele omwa hala okuya mo mofaalama’, osho omukolonela nguka a ti.Mboka ye li mofaalama oya lombwelwa shuukilila kutya inaya popya nando onaatoolinkundana.Aanona mboka yeli meni lyofaalama aniwa oya tegelela natango omatalashe ngoka ya uvanekelwa, oya ti iikulya mbyoka ha ya li nayo ha yo naanaa yi li nawa. Olundji iikulya yawo yesiku oyo omboloto.Aniwa aanona mbaka oha ya longithwa yo ita ya futwa sha.Ota ya ti ngele oya nyenyeta konkalo yawo ohaya lombwelwa kutya ota ya vulu okushuna.Ongundu oya ti yo ina yi uva sha kombinga yiilonga mbyoka kwa ti wa ota ya kalekelwa mepangelo, na oya uvu ashike shika moradio, ndele ha palupe ando lwaanambelewa ye ya kuyo.Otwa tegelela sigo okonima yomahogololo opo tu tale ngele oministeli onkuluntu, Nahas Angula okwa li ta popi oshili nenge okwa li ashike ta popi.