Aanona yomekondjo po Kandjengedi

AANONA ya valelwa mekondjelomanguluko ye li 119 lwaampoka, mboka omasiku ga zi ko ye ya ishewe pOmbelewa onene yOswapo pu Kandjengedi mOshakati moShana, metiyali oya gandja enyenyeto lyawo kOshifo shika kutya oye uvite uudhigu uunene sho inaya ya nayakwawo mboka ya kalele mpoka kwa li uule auhe wethimbo lya zi ko.

Aanona mbaka taya ti kutya, yo oya li oshitopolwa shimwe nayakwawo mboka ya kala pu Kandjengedi mpoka okuza mu Apilili nuumvo. Ashike pokati mpoka, oya kaya komagumbo, ya li ngeno ta ya iutha kelombwelo lyaawiliki yamwe yomEpangelo pomathimbo ya li ye ya talele po pu Kandjengedi mpoka, unene tuu ngashi Ndjayi gwOpolisi, Sebastian Ndeitunga noshowo Amushanga gwAanyasha yOswapo Elijah Ngurare noshowo yalwe.Aanona mbaka taya ti kutya sho ya uvu kutya otaya falwa ko Berg Aukas kOshaanda, oya zi ko komagumbo ye ye kuyakwawo mboka ya kala pu Kandjengedi mpoka, opo ya ye pamwe koBerg Aukas, ashike ohaluka sho ye ya mpoka, oya adha yakwawo mboka ya kala mpoka ya shanga po elandulathano lyomadhina li ili moka omadhina gawo inaga shangwa mo we.Tashi ti mboka ya kala ethimbo alihe pOmbelewa yOswapo pu Kandjengedi, ya tindila po, oyo ashike yi ishanga momusholondondo moka nokweekelahi ngoka omukulu.Sho aniwa omakambamba ge ya ile po momasiku omugoyi gOmwedhi nguka, mboka ya shangwa momusholondondo omupe, oyo ashike ya yiwa nayo, yo ta ya thigala po. Yamwe yomwaamboka ya thigala po, ngashi Sam Fillipus, Loide Sakaria, Linea Shikongo, Max Angula nayalwe wo, oompunda noondjato dhiinima yawo, ngashi oonguyo, omakumbatha, oongaku nOodokumende dhawo mwa kwatelwa nuukalata wawo womahogololo, oya yiwa nayo komakambamba ko Berg Aukas, oshoka sho aantu mboka ya tsilika iinima, sho ya kala taya tsilike, oya kwatela mo noyawo, nani yo momusholondondo gwoonakuya kaye mo. Oya kala nee nokukondjitha ya ilwe ko, ya falwe nayo koBerg Aukas, ashike aniwa oya lombwelwa kutya yo moshikonga shaamboka ye na okuya ko Berg Aukas kaye mo.Mboka ya li aakuluntu yawo pu Kandjengedi mpoka, ngashi aniwa Mahoka na Alma otaya ti yo kaye ya shi, onkee itashi vulika ya ye koBerg Aukas. Omapopyo nee ngoka kutya yo kaye shiwike, otaya ti kutya kage shi goshili, oshoka manga yamwe ya li komagumbo, yamwe yomaawiliki yawo pu Kandjengedi, oye ya dhengela kutya naye ye, ya ye ko Berg Aukas, ashike sho nee ye ya, oya adha kaye mo momusholondondo omupe, ngoka gwa kala ashike gwa kwatela mo mboka ya kala ethimbo alihe pu Kandjengedi mpoka. Taya ti sho ya pula kOministeli yAanyasha, nako wo oya lombwelwa kutya kaye shiwike ko. Esiku aniwa ndjoka, mboka yopuKandjengedi ya ya ko Berg Aukas, opwa li yamwe taya futithwa oshimaliwa kuyakwawo mboka aakuluntu opo ya ye, naamboka ya futu, oya yi. Frans Otto, gumwe gwomwaamboka ya kala po, ota ti kutya ye okwa li ta pulwa kumukwawo gumwe gwomwaamboka ya ya ko Berg Aukas, e mu pe N$20 opo a vule okuya. Molwashoka nee kali e yi na, okwa thigala po. Otaya ti wo kutya esiku ndyoka omakambamba ga ila po mboka yopuKandjengedi, opwa li pwa dhengwa yamwe, ye li yatatu, yomwaamboka ya thigala po. Aniwa taya ningilwa omatilitho kutya inaya kala we taya popyagula nokupulaapula.Aanona mboka ya thigala po otaya pula nee kEpangelo, ano kUuministeli wAagundjuka, kutya yo nee sho ya thigala po ngeyi, otaya ningwa ngiini. Taya ti yo oya hala okufalwa kuyakwawo ko Berg Aukas nokukaningilwa naanaa shoka tashi ningilwa yakwawo. Taya ti yo pu Kandjengedi itaya zi po, manga inaya mona eyamukulo ndyoka tali ya uvitha ombili. Otaya ti kutya yamwe yomwaamboka ya ya ko Berg Aukas okuza pu Kandjengedi, mEtiyali lyoshiwike shika oya galukile kuKandjengedi nokuya hinda, taya ti kutya naya ze po pOombelewa dhOswapo oshoka kaye shi wike kEpangelo nota ya hepitha ashike ethimbo lyawo. Angula ta lombwele Oshifo shika kutya mboka ya li ye ya mpoka, oye ya tidha po konima sho ye ya lombwele ngawo noku ya pa elombwelo kutya inaya galukila po we pu Kandjengedi.The Namibian, okwa kundana wo kutya kOtjiwarongo noshowo kOvenduka, kOshitopolwa sha Otjozondjupa nosha Komas, okwa za aanona ya valelwa mekondjelomanguluko ye li pomilongone lwaampoka, mboka nayo ya li ya thigwa po sho yakwawo hoka ya falwa ko Berg Aukas, ya ya kuyoyene ko Berg Aukas noye li ya yunga ontanda yawo pomweelo gwOkamba ya Berg Aukas.Omukuluntu gwAanona mbaka, Loide Vilho, okwa lombwela The Namibian Omaandaha ga zi ko kutya po Berg Aukas mpoka oye yile po mOlyomakaya ga zi ko, sho ya thigwa po kuya kwawo mboka ye etelwe ko Berg Aukas kuyele omwedhi nguka. Loide ta ti aniwa oya thigwa po oshoka aniwa iimaliwa mbyoka yiniwe kEpangelo oyuunona mboka kau na aakuluntu naatekuli, na kau na mpoka hau zi. Ta ti shoka kashi shi shoshili, oshoka ko Berg Aukas pethimbo wa yi hoka ohau zi ko nokuya hoka wa kala shito, omanga taku tiwa kutya kau na mpoka hau zi. Loide ta ti mpoka nee ye li posheelo shOkamba ya Berg Aukas opomwiidhi, hapu ya omayoka noondje.Kaye na iikulya nomeya gokunwa nokwiiyoga. Ta ti oya hala okuyamukulwa kOmuprima Nahas Angula muudhigu wawo mbuka, oshoka yamwe ngaashi mboka yomUuministeli wAanyasha, otaye ya ningi nayi unene. Loide ta ti, nonande ye li monkalo yi li nayi ngawo, itaya zi po mpoka sigo taya mono eyamukulo tali ya uvitha ombili, unene tuu okuzilila kOmuprima gwa Namibia ye mwene.