Aanona ya velelwa kombanda onkee ye li pOombelewa dhoSwapo

AANONA ya valelwa mekondjelomanguluko ye li 480 onkee ye li pOombelewa oonene dhoSwapo mOshana pu Kandjengedi mOshakati, taya ti itaya zi po mpoka manga inaya mona iilonga.

Oonakuvalelwa muupongekwa mbaka, nonande taya monene po iihuna pOombelewa dhoSwapo mpoka, otaya ti yo itaya zi po mpoka, oye ya komuvali gwawo Swapo na opo taya kala mpoka, sigo tate gwawo te ya pe iilonga.
Mokati kawo omu na oomeme mboka ye na uunona uushona noshowo mboka ye na omategelelo, noye li ya dhama muukumwewumwe kutya yo itaya zi po mpoka manga inaya pewa iilonga.
Omupopiliko gwawo John Malumbu, ota ti kutya pokuma mpoka oye li po taya sile po kondjala nokenota, oshoka kaye na po we iikulya nomeya ga yela, nohaya longitha ashike ngoka gomoshana molwashoka aanambelewa yOswapo mpoka ohaya pata omeya gawo.
Taya ti aniwa kutya oya tila ofuto yago yi londe pombanda nopu ka kale pwaa na ngoka ta vulu oku yi futa. Pombelewa yoSwapo pu Kandjengedi mpoka, opu na ashike uundjugo uyali wokuholamena, woludhi ndoka halu tapwa ngele wuudha onyata.
Hoka nee haka longithwa kuunona woonakulwa aakulu mbuka, okuudha onyata kwali na oya kala kaye na mpoka taya yi ye kiikwathele, oshoka okatiyali okAanambelewa naaniilonga pOmbelewa yoSwapo mpoka, na itaya vulu okukalongitha, mboka yoSwapo ya tila wo ka udhe yo ya kale kaye na mpoka taye kiiwathela uuna ya pumbwa okwiiwathela.
Kombinga yiikulya, aanona mbaka yOonakulwa aakulu oye li lela muudhigu wondjala.
Oya pelwe po ngaa uusila, oomboloto, omagadhi nosho tuu kugamwe gomomalenga gOndonga naanangeshefa, ashike ayihe mbika oya pwa po nale, noye li ngaa nee taya ehelaehela paashiwikile nookuume mpaka naampeyaka mOshakati nomomudhingoloko.
‘Nande tatu si ondjala ngeyi, nokumona iiuna yilwe, otwa dhama metokolo lyetu kutya pOmbelewa yomuvali gwetu Swapo mpaka, itatu zi po manga ine tu pa iilonga mbyoka twa hala,’ Malumbu ta ti ngawo nomukumo.
Aanona mbaka otaya gandja uusama uunene koonakuyakuta mUukwiita nenge miilonga yilwe mEpangelo. Taya ti kutya oye na okatongotongo mokukuta.
Haya kutu koombunda, unene mboka ye ya pamba nookuume kawo. Taya gandja omadhina gayamwe ya kutwa koombunda omasiku ga zi ko. Aanona taya indile Epangelo li tale po nawa mpoka meendelelo ngashi tashi vulika.
Otaya ti kutya yo oya pumbwa iilonga, oya pumbwa omahupilo, oshoka yamwe kaye na we aakuluntu yawo na kapu na ngoka te ya kwathele monkalamwenyo yawo.
Yamwe otaya ti kutya oya mana Ograde 12 na itaya vulu okutsikila okuya kOuniversity molwashoka kaye na iimaliwa na kaye na ngoka te ya kwathele oshimaliwa ye kiilongithe.
Aanona yOonakulwa aakulu mbaka otaya ti kutya oya shangela nee Omupresidende Hifikepunye Pohamba ombapila moka ya gandja omanyenyeto gawo noku mu indila e ya pe iilonga oshoka oya mona iihuna uunene noye li moluhepo olunene.
Oya li ya gandja ngeno ya kale ya yamukulwa ngeno manga eti 24 Apilili 2009 inali thika. Taya ti otaya longele kumw enayakwawo mboka ye li kOvenduka moshinima shika sheindilo lyawo lyiilonga.