Aanona ya valelwa kombanda ya maashinga

AANONA ya valewa mekondjelomanguloko mboka ya unga ontanda yawo pOombelewa dhOswapo pu Kandjengedi mOshakati moshitopolwa sha Shana ongula yohela (23.07.2009) oya maashinga nokuninga ehololomadhilaadhilo lyombili okuza pIOmbelewa yoSwapo pu Kandjengedi mpoka nOsenda yOongeshefa ya Yetu mOshakati moka nokuthinda koombelewa dhUuministeli wAanyasha mOshakati hoka ya gandja omushangwa gwawo gwomaindilo gaashoka ya hala ye shi ningilwe kEpangelo, unene tuu kUuministeli wAanyasha.

Ya yedha omapulakata ga shangwa kutya yo oya hala iilonga, Epangelo inamu lya po iinima yaantu, uulingilingi down na otwa hala Oosikola, aanona mbaka otaya imbi taya ti, ‘Natu mbombeni, natu lyateni ngu nenga mboka inaya hala tu mone iilonga. Ngu nenge mba inaya hala tu mone iilonga shapo ohatu ti naya pone okambi. Ngu ina hala tu yamukulwe na pone okambi. Ngoka ina hala tu yamukulwe na pone okambi.Tse uunona twa za kombanda, tutaleni otatu mono iihuna kumwe nuunona wetu. uuyuni wonena ou na omapaapeta ge na okaruptiona, inaga hala tu pewe iilonga. Tse otwa kala tu li mekanka tu pewe iilonga, tu humithe oshilongo komeho,’ taya imbi ngaw ya thinda kOsenda yAanyasha mOshakati, hoka ya ka gandja omukanda gwawo gwomanyenyeto komupehakuluntu gwOsenda ndjoka tate Sevirus Nashipili, ngoka sho e yi pewa a uvaneke kutya ote ke yi tuma nziya kOmb elewa yawo onene, ano kUuministeli wawo wAanyasha meendelelo ngashi tashi vulika. mOmukanda gwawo moka, aanyasha mbaka ya valelwa muupongekwa otaya pula Uuministeli wAanyasha kutya omolwashike omadhina gayamwe yomuyo ga kuthwa mo momusholondondo gwomadhina ga shangelwe omvula ya zi ko. Taya pula wo kutya otaya ka tegelela sigo uunake ano ya pewe iilonga? taya pula Oministeli yAanyasha kutya uunake te ke ya lombwela kutya ngashiingeyi okwiipyakidhila nelandulathano lyoku ya pa iilonga, unene tuu sho pwa pita ethimbo inaya mona eyamukulo lyasha keindilo lyawo. Aanona mbaka otaya indile wo kutya Oministeli yAanyasha yi ye yi ya popithe muudhigu wawo mbuka.Natango taya endulula momukanda gwawo moka kutya oya pumbwa iilonga. ‘Natu lombwelwe alikana kutya otu na po tuu omboloto mpoka nenge ahawe, oshoka opwa pita ethimbo ele inaya yamukulwa keindilo lyawo ndika. Otatu indile ngawo, twiikankameka keuvaneko ndyoka twa pelwe kEpangelo,’ aanona mbaka taya ti ngawo. Omaashinga yawo ndjoka ya tamekele pambelewa pOsenda yOongeshefa ya Yetu, oya li ya kwatelwa komeho kOpolisi.Kuyele aanona mbaka oya li ya ti kutya otaya gandja kUuministeli nokEpangelo kumwe noSwapo sigo opehulilo lyomwedhi nguka, ya kale ya yamukula keindilo lyawo lyokupewa iilonga nange hasho otaya ka katuka onkatu ya kwata miiti. Oya li wo ya gandja uusama kaawiliki yoSwapo mOshana, unene tuu kOmuunganeki gwoSwapo mOshana tate Erastus Uutoni na Gavena ya Shana tate Klemens Kashuupulwa, kutya kaye na ko nasha nayo notaye ya etha ya monene po iihuna poombelewa dhoSwapo puKandjengedi, mpoka ye li po kaye na po iikulya, omeya ga gwana, ootenda/oothailadhokukala nashi yakwawo komahala gamwe kOvenduka nokOtjiwarongo noshowo oothewa dhokwiiyoga nokuyoga iinima yawo nosho tuu oompumbwe dhilwe.