Aanona mboka ye na uulema oya taalelwa komaudhigu ogendji

UUNONA mboka tau lumbu nomaulema gomaludhi ga yooloka owa taalelwa komaudhigu omanene moshigwana, mwa kwatelwa mboka wokukala inau yalulwa nokaavali yawo yene.

Shika otashi ulikwa komasiloshimpwiyu gaanona mbaka haya mono mOmandiki ngoka taga kambadhala okuyambulapo onkalonawa yaanona mbaka, kutya nee okelongo nenge okevyulonkalo ga kale wo nago ga hepa omayambidhidho.
Endika lyedhina Dr. Aupa Iindongo Special Care Centre olyo limwe lyomugo.
Endiki ndika lya totolwe momumvo 2001 endiki lya nyolitha okuyakula nokulonga aanona yena omaulema ya yooloka, mokuya pa elongo lyopetameko noshowo oku dheula mboka yena omaunkundi gokolutu.
‘Otu na mo aanona yamwe ye na oomvula 15 sigo 18 mboka yena omaunkundi gokwiilonga noya tumwa okuza koosikola dhontumba opo tuya watele. Aanona mbaka ota tu kambadhala okuya watela, nongashingeyi otwii adha tatu ya longele mumwe nayakwawo mboka aashona opo taa tameke osikola omolwa ompumbwe yoongulu dhokulongela. Shika otashi eta uudhigu mehumokomeho lyaanona,’ Omukuluntu gwEndika ndika, meme meme Aili Shilongo, ta popi ngaaka.
Shilongo okwa ti kutya nonando oya adha omasindano ogendji miilonga yawo, ngaashi oyali ye etelwa aanona wumwe kaushi okulya ihe ngashingeyi otawu vulu okulya woo wene nuukwawo ita u vulu okweenda, nokulesha ihe ngashingeeyi otau ningi iinima mbjoka.
Nonando otaa yi komeho ngaaka, osikola ndjika oya taalela omashogo ogendji mwa kwatelwa ompubwe yiikulya noshowo iikwathitholongo. Shika otashi keelele om pangela yawo yokuhumitha aanona taya lumbu nuulema ya ninge aakwashigwana yena oshilonga moshilongo shetu yiye komeho.
‘Ota tu indile aakwashigwana yetu yambidhidhe nomakwatho ngaashi iikulya, omizalo dhOsikola dhaalongwa yetu mboka itaa vulu okwiilandela yoyene, omambo noshowo iilongitho yokutunga oongulu oompe dhosikola noshowo dhomuhandjo.
Ngashiingeyi moongulu moka hatu longele ohatu dhi longitha ongo oondjugo dhokulala,’ ta tsikile ko ngaaka.Okwa pandula aakwashigwana nomahangano ngoka ga kaala nokukwatha Endiki ndika li hume komeho.
Aantu mboka ye na ehalo okugandja omakwatho otaa vulu oku ninga ekwatathano nameme Shilongo kongodhi 081 3150 427. Mboka ya hala okugandja omakwatho goshimaliwa otaa vulu okushi ninga konomola yomasiikililo yeendiki ndika: Dr. Aupa Iindongo Special Care: Onomola yombaanga: 62091832884 First National Bank Oshakati