Aaniilonga yo Polytechnic yahala NAPWU a ziminwe

A
ANIILONGA yomo Polytechnic ya Namibia oya indile natango ewiliko lyoshiputudhilo shika opo li zimine ehangano lyaaniilonga yomepangelo opo li ya kalelepo kombinga yiinima yina sha niilonga yawo noshowo omauwanawa gomiilonga yawo.

Oshikumungu shika pokati kaaniilonga newiliko lyenongelo lyopombanda ndika osha kala ethimbo ele, nonatango ina shi monenwa eyamukulo.Omukuluntu gwenongelo ndika, Tjama Tjivikua ina inyengithwa kehololomadhiladhilo gaaniilonga etiyali opo a zimine kutya Napwu oye na kalelepo aaniilonga penongelo ndyoka. Ewiliko lyo Poly naandyoka lya Napwu oya kala konyala omimvo 15 taya kondjithathana kombinga yekalelopo lyaaniilonga kehangano lyaNapwu. Ehangano lyaaniilonga olya lundile ewiliko lyo Polytechnic kutya otali nkundipike uuthemba waaniilonga, omanga enongelo olya ti aaniilonga nenge Napwu iti yutha komautho gompango yAaniilonga.Aaniilonga metiyali oya li ya holola omadhiladhilo gawo pomweelo omunene gwokuya moPoly na oya li ta ya indile kutya Tjivikua na tidhwe mo miilonga. Yamwe oya li ya humbata omaplakata taga tilitha kutya itaku ka shangwa omakonakono ngele Napwu ina ziminwa oye a kale omukalelipo gwawo. Gamwe gomo mambapila oga li ga nyolwa kutya pwaana ezimino lya Napwu, kapena omakonakono.Uule woomvula dha piti opwa kala oohapu kutya ewiliko lyo Poly oha li thindile aaniilonga kongudhi na ishewe ohali mbandameke yamwe, ndele kushika Tjivikua okwa pula kutya omolwashike enongelo inaa li falwa kompangu mwaashika.Aahololi madhiladhilo oya li mewiliko lyomuperesidende gwopevi gwa Napwu, Moses Ikanga no ya igidha ya hala Napwu a ziminwe okuya kalelapo.Omukanda nyenyeto ngoka gwa nyolelwa ewilikongundu lyo Poly ogwa ti ewiliko lyo Polytechnic oha li dhini uuthemba waaniilonga, na ishewe aaniilonga menongelo ndika ota ya mwenya monkalo yuudha uumbanda nuutile, oya gwedha ko kutya enongelo ndika olya tidha mo aaniilonga yamwe mboka ya kambadhala oku ninga iilyo ya Napwu aniwa.Omukuluntu gwenongelo ndika, Tjivikua okwa indile Napwu opo a ulike kutya aaniilonga melelo lyenongelo ndika oyo iilyo ya Napwu. Okwa ti opena okukala uumbangi kutya Napwu oku na omwaalu omunene gwaaniilonga mbaka ongo iilyo.Oonkambadhala odhindji dha ningwa ku Napwu opo a kalelepo aaniilonga menongelo ndika oye awike odha li dha tindwa. Ndele Tjivikua okwa uvaneke kutya ngele ehangano ndika olya ningi omahogololo naaniilonga oyendji oye li hogolola , nena ndika ota li ka ziminwa li kale olyo ekalelipo lyawo.Okwa ti omimvo mbali dha piti Napwu ka li ta vulu okuulika omwaalu gwiilyo mbyoka ena mokati kaaniilonga penongelo mpoka. Okwa gandja ombedhi ku Napwu shoka iihumbata momukalo gwa nesimaneko nenongelo. Na okwa ulike euvo nayi lye keponokelo ndyoka lye mu ukithwa, nokwa ulike kutya ye ota longo palombwelo lyewilikongundu lyenongelo ndika na iniikuthilha etokolo oye awike.