Aaniilonga yepangelo ota ya ka futila omaopaleko

AAKALIMO momagumbo gepangelo otaya kala noshinakugwanithwa shokufutila iilonga yomaopaleko gomagumbo noshowo guufleta moka yelimo.

Shika otashi ningwa opo epangelo kaali kale ta li futile iilonga yomaopaleko gatya ngaaka ngaashi ha li shi ningi pethimbo ndika.
Ominista Yiilonga nomalweendo, Erkki Nghimtina okwa tseyithile aaniilonga yuuministeli we po Keetmanshoop metitano.Pahapu dha Nghimtina aakalimo momagumbo gepangelo otaya ka pulwa opo ye meuvathano nepangelo ndyoka ta li ya thiminike opo ya sile omahala ngoka oshimpwiyu.
Ngele otaya thigi po ehala, nena opena oku ningwa ekonakono opo pu talike kutya ndika olya silwa nawa oshimpwiyu nuuna ndoka lya pumbwa okwoopalekwa nena iilonga ye opaleko ota yi futilwa ku na ku kala megumbo ndyoka.
Okwa londodha aakalimo yomomagumbo opo kaa ye ga thigepo ga yonuka , go inaa ga opalekwa, ngele oye shi ningi nena ota ya kala ye na oshinakugwanithwa shokufutila iilonga yiinima mbyoka ya yonuka.
Okwa indile opo ombepo yokwaanakonasha yi hulithwepo. Nghimtina okwa londodha woo ishewe kutya uuministeli we otawu ka longa nuudhiginini opo wu kuthemo aantu mboka haya kala momagumbo gepangelo pwaali pampango.
Omupevi gwa Nghimtina,Chief Samuel Ankama okwa indile aaniilonga opo ya longele kumwe na ishewe ya yande okulongitha nayi iikolitha ngele oye li miilonga.
Kombinga yawo aaniilonga oya nyenyeta koshinima shiitungitho ya pumba noshowo sho pwaana elongo lyaamboka yeli miilonga okulongwa shoka haya longo, yamwe oya pula kutya uunake iilonga yostora yepangelo ta yi gandjwa kiitopolwa.
Nghimtina okwa zimine kutya uuministeli we owu na shili eshongo lyoluhepo lwiitungithi, shika oshi li ngaaka molwaashoka iimaliwa oyo inaa yi gwana.