Aaniilonga yane yEpangelo ya kwatwa po

A
ANIILONGA yatano mEpangelo, mwa kwatelwa Aapolisi yaali noshilyo shOshikondo shomakonakono gomonanguwu, oya kwatwa po kOkomisi yEkondjitho lyiilonga yOkoraputo/Anti Corruption Commiission (ACC), sho aniwa ya kutha omutalelipo gwomwAamerika oshimaliwa shOondola/N$2 000 shaali pauyuuki.

Aalumentu mbaka oya li ya holoka mOmpangu ya Mengestrata mOvenduka mEtine, ya lopotelwa oshipotha shegandjo lyombumbo, sho aniwa yi iningi ya fa aanambelewa yiinima yokoongamba na nokulongitha ohauto yUuministeli wIikwameni, mokulonga oshikoya shika.
Aafekelwa mbaka oyo oshilyo shOshikondo shOmakonakono gOmonanguwi, Hilcardo Kuhlman (29), Konstable Chris Garoeb (40), Konstable Paul Jarson (36) nOmunambelewa mUuministeli wIikwameni, Nicholas Keramen (31). OmwAamerika nguka okwa popi kutya ye okwa li hazi pOlodge yimwe mOvenduka, sho aalumentu mbaka ye ya po taye mu kongo.
Oya li aniwa ye na ohuato yUuministeli wIikwameni na oya li yi iningi ya fa aanambelewa yokoongamba. Aalumentu mbaka oya li aniwa ya pula omwAameriuka nguka e ya pe opasporta ye molwashoka opwa li pu na sha sha puka moondokumende dhe dhoka e ya nadho mu Namibia.
Oya li nee aniwa ye mu lombwele kutya otaye mu kwata po, ihe ngele okwe ya pe sha otaye shi ningi. Oye mu fala nee aniwa kOmbaanga ya Nedbank pu Ausspanplatz, hoka a ka nana oshimaliwa, a kalelwa ku gumwa gwomaafekelwa, ngoka oye wo aniwa a li e na opasporta yomutalelipo na okwa li ashike e yi mu pe sho ta nana oshimaliwa meni lyOmbaanga.
‘Okuza mpoka, omutalelipo okwa li a falwa kOshitaasi shOpolisi mOvenduka, hoka a li a ka kwathelwa kOmupolisi a ninge eindilo lyonzapo yeyono,’ ACC ta popi ngaaka. Sho nee a ningi ngaaka, oye mu shuna kOlodge hoka ye mu kutha na mondjila, okwa li aniwa e ya futu oshimaliwa shOondola/N$1 800.
Omutalelipo okwa li nee a lopota oshinima shika ku ACC meendelelo.
Kuhlman, ngoka oye a kwatwa po tango okwa – okwa mangwa po pauyelele wa zi kOmbaanga na okwa fa nee oya a holola yakwao.
ACC okwa ti mopasprta yomutalelipo kamwa li mu na sha sha puka.