Aaniilonga ya NovaNam mboka ye li mekanka ya kwatwa po

AAPOLISI yoshikondo sho Special Field Force oya kwata po aaniilonga yatano ye li mekanka yOkampani yoohi ya NovaNam.

Aaniilonga mbaka oya kwatelwa pofaambulika yOkampani ndjika pOliindil, molwashoka oya li aniwa ya taaguluka elombwelo lyOmpangu kutya ina ye ya meni lyoometa 400 nofaambulika.
Aaniilonga mbaka oyo: Fillipus Ndapona (28), Jonas Johannes (380, Petrina Kandowa (40), Hosea Charles Amesho (40) na Sakaria Joseph (40). Ekwatopo lyawo uusiku wEtine nongula yEtitano, olya ningwa konima sho Opolisi ya tula pokati Omuunganeki gwObrancha yehangano lyaniilonga lya Seamen and Allied Workers Union (Nasawu), Petrus Shiyandja po Letu Cash Wash uusiku wEtitatu.
Shiyandja naaniilonga mbaka yatano oya li ya indile ya pewe ombooloha, ihe ine ye yi pewa molwashoka Amushanga gwOmpangu, ngoka oye li a uvu oshipotha shawo, ke na uuthemba okuninga ngaaka.
Ayehe yahamano oya lopotelwa oshiptha shetaaguluko lyelombwelo lyOmpangu na otaya ka shuna kOmpangu momasiku 3 ga Febuluali nuumvo. Amushanga gwOmpangu oye a uvu oshipotha shika molwasoka, Mengestrata oku li natango mefudho.
Opoosa yOmweetipo gwiipotha mOmpangu ya Mengestrata pOliindili nayo oyi li wo natango owala, sha zi mpoka sho Omweetipo gwiipotha ngoka a li a po, a li falwa palwe pehulilo lyomwedhi gwa zi ko.
Aaniilonga ye li 1 000 lwaampoka mOkampani ya NovaNam oye li natango ya yunga ontanda oshinano shoometa 500 okuza pofaambulika yOkampani, konima sho ya yi mekanka momasiku 8 ga Desemba. Ekanka oye li ningi konima sho oonkundathana kombinga yeindilo lyawo kutya oondjambi dhawo nadhi gwedhelwa, dha adha okwena kwa hula.
Aaniilonga oya hala oondjambi dhawo dhi gwedhelwe noshimaliwa shoopelesenda heyali, ihe Okampani otayi ti kutya otayi vulu ashike okuya pa oopelesenda ntano. Aaniilonga oya dhika oonyala mevi kutya opo taya ka kala mpoka, sigo Okampani ye ya ningile shoka taya pula.
Oshifo shika osha yakelwa ko kutya NovaNam okwa lombwela aaniilonga mboka ye li mekanka kutya otaya ka tidhwa ngele inaya shuna kiilonga nena. Okampani ndjika oya tokola wo aniwa kutya itaya ka gwedhele oondjambi dhawo, molwashoka aniwa ekanka lyawo olya eta Okampani yi kanithe oshimaliwa oshindji.
Omathimbo ga zi ko, NovaNam okwa li a popi kutya ota ka gwedhela oondjambi dhaaniilonga. Otaku popiwa kutya ngashiingeyi NovaNam oha kanitha oshimaliwa shi li lwopOondola/N$900 000 mesiku, omoli ekanka ndika.