Aaniilonga ya Cadilu ya shaina ookondaraka oompe inaya hala nawa

AANIILONGA ya thika pomathele gaheyali mOkampani yokukwata oohi ya Cadilu Fishing pOmbaye, ndjoka tayi ka hulithwa po molwashoka oya mbangolota – oya li ya shaina ookondaraka oompe dhiilonga yopakathimbo inaya hala nawa.

Iilonga yawo otayi hulu po pehulilo lyomwedhi nguka. Okuza mEtine sigo omEtitano, iilonga mOkampani ndjika oya li ya mwena konima sho aaniilonga ya egeke iilongitho – yu uvite nayi molwashoka kaye shi kutya onakuyiwa yawo miilonga oyu uka peni.
Shika oye shi ningi konima sho Ompangu yOpombanda mEtitatu, ya tula Okampani ndjika membangoloto. Eindilo kutya Okampani ndjika nayi talike ko ya mbangolota, olya li lya falwa kOmpani kOmbaanga ya Standard Bank . Dave Bruni na Ian McLaren yOkampani ya Investment Trust Company (ITC), oyo ya li ya ulikwa ya ungaunga niinima ya Cadilu Fishing, sigo ya hulithwa po thilu-thilu.
Metitatu lya zi ko, aaniilonga ayehe oya li ya pewa oombapila moka ya lombwelwa kutya iilonga yawo otayi ka hulithwa po, ihe opo Okampani yi hulithwe po pamukalo gu li nawa, ITC ota ka kalaka po iilonga sigo opehulilo lyomwedhi nguka. Aaniilonga oya li ya lombwelwa kutya ITC ota ka futa oondjamabi dhawo , ina ku kuthwa sha.
Aaniilonga oya li nee ye na okushaina ookondaraka dhiilonga oompe na ITC. Konima nee yoshigongi mpoka aaniilonga ya li ya kuthwa ko kwaashihe kombinga yehulithpo lya Cadilu Fishing, aaniilonga oya sitopa okulonga. Aaniilonga kaya li ya hala okushaina ookondaraka ompe dhiilonga yopakathimbo, manga ookandaraka dhaow na Cadilu inadhi manithwe nosho wo manga inaya futwa iimaliwa yawo shu udha. Konima yoshigongi shehangano lyaaniilonga lya Namibian Seamen and Allied Workers Union (Nasawu), Ewiliko lya Cadilu Fishing na ITC, aaniilonga oya li ya pewa omahogololo gaali: okushaina oonkondaraka oompe nenge omiyelo dhOkampani dhi patwe yo taya kala kaye na iilonga.
Onzo yimwe yomauyelele oya yakele ko The Namibian kutya aaniilonga oya ka tameka ne niilonga konima sho ya shaina ookondaraka oompe. gShika oshinima tashi uvitha nayi notashi lyalyakanitha, moka twa thiminikilwa. Kapu na ekwashilipaleko kutya ota tu kala niilonga konima ya Febuluali nenge ota tu futwa okuudha ku Cadilu, h omuniilonga gumwe osho a popi ngaaka.
Oshiwike sha zi ko, Omukwatakanithi gwehangano lyaaniilonga lua Namibian Food and Allied Workers Union (Nafau) moshitopolwa sha Erongo Cleopas Ngwena, okwa li a popi kutya oonkundathana na Cadilu Fishing odha tameka opo ku kale kwa talika kutya aaniilonga oya mona uupaketa wawo wa gwana po , molwashoka oshi ikwatwa kutya otashi vulika ya ka kanithe omauanawa gawo galwe, ngele Okampani oya tsuwa ashike ekumba meendelelo.