Aaniilonga taya longele kumwe nomunamina

EHANGANO lya Weatherly International olya tseyitha euvathano lyongushu yoodola oomiliona 100 ndyoka ta li ka yumudhapo iilonga yomina yOtjihase na Matchless noshowo omina yoholo nozinc po Berg Aukas.

Ehangano ndika ha li fulu iitenda mbika olya yi ishewe meuvathano nehangano lyokupungula lyaaniilonga lya Labour Investments Holdings noshowo ehangano lya Shali opo mbaka ya longele kumwe mokunima ongopolo poomina Otjihase na Matchless.
Omukuluntupitithi gwa Weatherly, Rod Webster okwa ti oku kalapo kwaapunguli yomoshilongo meuvathano ndika okwa simana moku tamekulula iilonga yoomina mbika ya kala ya pata konima sho ondando yongopolo ya shuna na yi pevi muuyuni .Oomina ndhika odha kala dha pata okuza 2008 sho ondando yongopolo niitenda yilwe ya gu pevi, oomina ndhika odha kala ashike tadhi silwa oshimpwiyu opo kaadhi udhe omeya nosho tuu.
Weatherly pauvathano ndika okwa gandja iipambuliko yooperesenda 20 kookuume ke miilonga mbika, osho Webster a popi momushangwa gwoonkundana.
Ehangano ndika ota li kundathana woo nehangano lyoomina lyepangelo lyedhina Epangelo noshowo na Nam-mic ewawa lyokupungula lyehangano lyaaniilonga yoomina MUN.
Webster okwa ti etopolo lyiipambuliko mokati komahangano ngaka taga longele kumwe na Weatherly ota li ka ningwa mbala.Ongopolo yotango oku za momina ya Otjihase oya tegelelwa poshitine shotango shomumvo ta guya, shika otashi ka landulwa kelongo lyongopolo okuza momina ya Matchless moshitine oshitiyali shomumvo ogo tuu ngoka.
Okwaadha shika Weatherly okwa mono omukuli gwoodola dhAmerica oomiliona 7 nenge oomiliona 53 dha Namibia, okuza kehangano lyomulandithi gwiitenda lyedhina Louis Dreyfus Commodities.Omanga iimaliwa mbyoka ya hupako ota yi zi moondjato dha Weatherly unene tuu kwaambyoka ye ya mo sho a landitha po omina ya Kombat, noshowo omaliko gamwe gopamatungo nevi. Pehulilo lya June Weatherly okwa li ena oodola dhAmerica mombaanga dhi li oomiliona hamano.Kuyele nuumvo ehangano olya li lya gandja iilonga ku Coffey Mining opo a ninge ekonakono lyi ithikamena kombinga yedhiladhilo lyalyo lyo ku tameka okumina pOtjihase nopo Matchless.
Ekonakono ndika olya holola kutya iilonga mbika ota yi vulu okutameka ishewe meni lyoomwedhi hamano, ndele olya ulike kutya Weatherly ota ka pumbwa oodola oomiliona 61, 4 pomina yOtjihase uule woomvula mbali dhotango omanga oomiliona 39,9 ota dhi ka kala dha pumbiwa okulonga poMatchless uule woomvula ndatu petameko.Ekonakono olya ulike ishewe kutya oodola oomiliona hetatu otadhi kala dha pumbiwa okutsikila niilonga poomina ndhoka mbali uule woomvula ne tadhi ya.
Weatherly okwa hala oku longa ongopolo yootona 7 000 komumvo uule womimvo ntano sigo opo mumvo 2015, ootona ndhika otadhi ka ya pombanda sigo opo mayovi 9000 pokati komimvo 2013-14.
Ehangano ota li ka longitha aaniilonga yomahangano galwe opo ya mine ongopolo opo li vule okulonga nawa. Sha hala okutya aaniilonga ya kutwa ku Weatherly otaya kala aashona, naambaka oomboka ashike yeli mewiliko lyehangano, miinima yuungomba,noshowo mewiliko lyiiniwe.Weatherly okwa shaina woo euvathano nehangano lya China opo ya pendulepo omina yoholo nozinc poBerg Aukas.
Mbaka oya hala oku tunga po ehangano epe ndyoka li na okushangwa momusholondondo gwomahangano ga shangwa komalanditho giipambuliko lyo moLondon.Ehangano lyaa China ota li ka futa oodola oomiliona 55 omolwa iipambu yalyo meuvathano ndika.Euvathano ndika lya thanekwa olya tegelelwa li ka kolekwe pehulilo lyomumvo 2012.
Webster okwa ti elongelokumwe na ECE gwoko China ota li eta ompito yeyo komeho kehangano lye lya Weatherly.Okwa ti oshilalakanenwa shotango shehangano lyuukumwe osho oku ninga ekonakono lyuudha ngele omina ya Berg Aukas ota yi vulu okuyumudhwa po.