Aaniilonga mo RCC ya ya mekanka

AANIILONGA ayehe yomOkampani yEtungo lyOondjila ya tseyika nedhina mOshiingilisa Road Construction Company (RCC) yomoNooli mEtiyali lyoshiwike shika oya tokola ya ye mekanka taya pula oondjambi dhawo dhi gwedhelwe mOmwedhi nguka Septemba, nangele hasho kiilonga itaya yi ko we tuu nande sigo eindilo lyawo ndika lya gwanithwa po.

Aaniilonga mbaka, oya gongalele pOmbelewa yawo onene moNooli pOsenda yOmaulikilo gIikwaipindi gaNgwediva mOngwediva moka ya gandja omukanda gwomanyenyeto nomaindilo gawo kOmukuluntu gwo RCC mOshitopolwa omusamane,Wabomba Singoro.Momukunda gwawo moka, aaniilonga otaya ti kutya oya hala oondjambi dhawo dhi gwedhelwe nooperesenda omilongombali 20% momwedhi nguka Septemba, nangele hasho nena kiilonga itaya yi ko we.Yoyene oya tameka nale ekanka mEtiyali moka, noya ti itaya shuna ko we kiilonga manga eindilo lyawo ndyoka inali gwanithwa po.Aaniilonga mbaka meindilo lyawo taya ti oya hala okupewa eyamukulo lya yela meti 18 Septemba 2009, ano ngula ndji tayi pi oshikundu.Aaniilonga mbaka taya ti wo kutya oya hala ya pewe iihohelafuto yomaenditho gawo yooN$700 noshowo ooN$80 yi gwedhwe kiihohelafuto mbyoka haya mono yomokuti.Taya lombwele Ewilikongundu lya RCC kutya omuniilonga a sa ondjala oye ngaa omuniilonga a geya. Onkee oondjambi dhawo nadhi gwedhelwe opo ya ze ondjala nongeyo.Otaya ti wo ngele itaya gwedhelwa nena nayo itaya ka futa we iimaliwa mbyoka haya futu NAPWU komwedhi kehe okuza koondjambi dhawo.Taya pula wo RCC kutya omolwashike ta ti ke na iimaliwa ye ha landa iihauto ipeepeeka ethimbo alihe? Taya pula wo kutya oshimaliwa shoomiliona ntano sha PABODZI oshi li peni?Sho a taamba ko ombapila yawo yomanyenyeto, omusamane Singoro okwa ti kutya omukanda gwawo nguka ote gu fala kEwilikongundu lya RCC li ke gu kundathane nokutala kutya oshike taya tokola po mwaashoka taya indile shi na sha negwedhelo lyoondjambi dhawo.Singoro ta lombwele aaniilonga yawo mpoka kutya uupyakadhi wawo mbuka owu shiwike nawa kEwilikongundu lya RCC noku li te wu kundathana nEhangano lyAaniilonga lya NAPWU moshigongi shoka sha tameke ohela meti 16 Septemba 2009.Nande e ya lombwela ngawo, aaniilonga otaya ti kutya manga ngaa inaya uva kutya eindilo lyawo olya itaaliwa ko, kiilonga itaya yi ko nande.Omukalelipo gwaaniilonga mbaka, tate, John Munkawa, ngoka a lesha nokupa tate Singoro omukanda gwawo gwomanyenyeto nguka, okwa ti aaniilonga oya tokola okukala mekanka sigo taya yamukulwa nokukwashilipalekwa kutya, oondjambi dhawo otadhi ka gwedhelwa nooperesenda omilongombali (20%).