Aangola yatano ya kwatwa nOkokeina

AANGOLA yatano oya kwatwa mEtitatu lyoshiwike shika sho ya adhika noopela dhOkokeina pokapale koondhila kOpaigwana ka Hosea Kutako pondje yOvenduka.

Aalumentu mbaka oya li ya kwatwa po kAapolisi yOshikondo shOkukonga Iingangamithi, mboka ya li ya yakelwa ko manga aalumentu mbaka inaya thika mu Namibia.
Pokapale oye ya po nondhila tayi zi ku Johannessburg, moka ya li ye ya mo okuza ku Sao Paulo mu Brazili. Omutenya gwEtitatu, aalumentu mbaka oya li ya falwa kOshipangelo sha Katutura, hoka ya ka hadhwa oopela dOkokeina ndhoka ya li ya pona.
Yane yomuyo oya li aniwa ya pona oopela ndhika. Omutitano gwawo, ngoka a li a ta monika a ngunguma noha popi uunene, otaku popiwa kutya oye Omuwiliki gwa yakwawo. Ihe okwa lombwele Oshifo shika kutya ye mbeyaka yane kaye shi ookuume ke na ko Brazil ye okwa li a yi a ka lande iikutu ye. Manga Oshifo shika shi li pOshipangelo shika omutenya gwEtitatu, omufekelwa ngoka e li omushona kuyakwawo ayehe (gwoomvula 25), okwa li a niko oopela dhOkokeina dhi li 26 na dhimwe odhindji odha li natango dhi li momandjandja ge.
Ota ku popiwa kutya oopela ndhika 26, mepandaanda ohadhi monika koshimaliwa shi li pOondola/N$270 000. Omufekelwa gulwe okwa li a kutha ko oopela dhi li ndatu. Ekunyako oopela ndhika ohashi ehama noonkondo na aafekelwa mbaka oya li taya kugu sho taya ningi ngaaka.