Aanenentu yamwe otaya ki idhilika iikulya

JOHANNESBURG – Aanentu yamwe, mwa kwatelwa Omumbiishofi omukuluntu gwOngeleka ya Aglican Desmond Tutu, otaya ki idhilika iikulya sigo uupyakadhi mboka u li mu Zimbabwe wa monenwa ehulilo.

Shika osha popiwa kehangano lyedhina Save Zimbabwe Now, tali ningi oonkambadhala dhi na sha nokweeta onkalo mu Zimbabwe kuuwanawa. Aantu mbaka otaya ki idhilika iikulya okuulika kutya oyi ikwata noye uvitile nayi onkalo moshilongo shika.
Pethimbo ndika, aantu oomiliyuna mu Zimbabwe oye li ya taalela ondjala nomauwinayi esiku kehe, pamikalo dha yooloka. Omupresidende gwehangano lyedhina World Alliance for Citizen Participation, Kumi Naidoo nOmunashipundi gwehangano lyedhina SA Gender Commission, Nombiso Gasa, nayo otaya ka ninga omasiku 21 inaya lya. Otaya ka nwa ashike omeya na otaya ka kala haya zi mOngeleka ya Central Methodist Mission mu Johannessburg, uule womasiku ngoka. Aanamiti opo taya ka kala pOngeleka ndjika yi ilongekidha, uuna pwa holoka kombinga yuundjolowele wawo. Aanentu yalwe mboka taya ‘ndjoina’ wo eidhiliko ndika, oyo Omunashipundi gwOkomisi yUuthemba wOmuntu mu South Afrika, Jodyy Kollapen na Jodyy Ivor Jenkins. *Momaandaha goshiwike shika, oonkundathana kombinga yedhiladhilo lyokweeta po Epangelo lyopaukumwe mu Zimbabwe, odha hulu ina pu tokolwa sha. Omukwanepangelo gumwe okwa popi kutya aaleli yiilongo yAafrika lyUumbugantu otaya ka kundathana okwaatsa kumwe pokati kOmupresidende Robert Mugabe nomOmuwilii gwongundu Movement for Democratic Change (MDC), Morgan Tsvangirai, poshigongi shiilongo yo SADC, tashi ka kala mu Botswana nenge mu South Afrika oshiwike tu uka. Mugabe na Tsavangirai ayehe oya zimina aniwa okuya koshigongi shika. ‘Kutse ong’MDC, ndika olyo ngiika esiku eluudhe noonkondo monkalamwenyo yetu,’ Tsvangirai osho a popi ngaaka, konima yoonkundathna dhika – dhoka dha li dha kwata oowili omulongo nambali. Epangelo lyopaukumwe okwa talika kutya ogwo ashike oshinima tashi ka kwathela okukwathela eliko oshilongo shika kali ye moshiponga thiluthilu. Pethimbo ndika, oondando dhiinima ohadhi ndambula kehe esiku na aantu ya konda po 2 000 oya si komukithi gwOkolela. Nande ongaaka, etsokumweuvathano lyokweeta po Epangelo ndika mu Zimbabwe (ndyoka lya li lya shainwa mu Septemba gwomumvo gwa zi ko), olya ndopa okweeta po sha shomupondo – sha etwa kokwaatsakumwe kutya kombinga yOoministri dhoka dha simana. Mugaba okwa ti oonkundathana odha ndopa okweeta po, ihe otashi ka tsikila. Mugaba okwa gandja uusama ku MDC, ta ti kutya opaati ndjika oya mboloka shoka sha li sha tokolwa ku SADC kombinga yokweeta po Epangelo ndika moshilongo. Nande ongaaka, Tsvangirai okwa ti MDC okwa moshilongo mu ye Epangelo lyopaukumwe moshilongo, ihe ongele ashike Mugabe ta ka gandja Ooministeri dha kola ngashi ndjoka yIikwameni, yIimaliwa noyOmauyelele kopaati ye. Omupresidende gwa South Afrika Kgalema Motlanthe, Omupresidende gwa Mozambique, Armando Guebuza nOmuungaungi nonkalo ya Zimbabwe Thabo Mbeki, omo ya li moshigongi shika. Omukuluntuwiliki gwa SADC, Tomaz Salmao, okwa ti oshigongi shomeendelelo sha SADC shoka tashi ka ningwa mOmaandaha, otashi ka kundathana eindilo lya Tsvangirai. Okuza mpoka, ota ku ka pitithwa nee omushangwa, Salmao osho a popi ngaaka.