Aakalimo yomomukunda Oshikondiilongo moshikandjohogololo shaKatyali, moshitopolwa shaShana oyi ikwata ombandamutse sha landula sho ya thigwa pongalangala komulilo ngoka gwa yangatitha po egumbo lyaandjawo, mEtiyali.
Aanegumbo yaheyali mwa kwatelwa omukulupe gwomimvo 93, nokanona komimvo 4 otaya kongo omakwatho sha landula sho ya thigwa kaaye na we mpoka taya zi, omolwegumbo lyaandjawo ndyoka lya thigwa momutoko sho lya pi po komulilo ethimbo lyongula, uunambo.
Moonkundathana noThe Namibian, Vilho Andreas, okwa hokolola kutya omulilo ogwe etwa kokanona komimvo 4 pethimbo aanegumbo kwa li taya longekidha oshuumbululwa.
Okwa hokolola kutya oya kanithila mo iinima ayihe mbyoka ya li megumbo, mwa kwatelwa omikanda dhopashigwana, omakumbatha, iikulya, iikutu osho wo omambo gaanona gokosikola.
Omolwonkalo yomeya ga pumba momudhingoloko, Andreas okwa popi kutya aanegumbo kaya li taya vulu okudhima omulilo ngoka molwashoka megumbo ka mwa li mu na omeya.
“Okwa li ngaa twa ningi onkambadhala yoku ka teka omeya momithima ndhoka dhi li popepi opo tu dhime omulilo ngoka ashike inatu shi pondola,” osho a popi ngaaka.
Andreas okwi indile epangelo osho wo aasamaria aanamutimahenda ye ya kwathele mpoka taya vulu unene tuu ngele otashi ya kiikulya, iizalomwa, omakumbatha, osho wo iitungitho.
Kansela gwoshikandjohogololo shaKatyali, Joseph Mupetami okwa koleke oshiningwanima shoka konzonkundaneki ndjika. “Eeno, egumbo ndyoka lya pya po thilu sigo omomutoko. Inandi ya ko natango ashike aakwanezimo oya tseyithila ndje oshiningwanima shoka. Otandi tumine ko omunambelewa mEtitatu,” osho a popi ngaaka.
Oshiningwanima shoka shomulilo osho oshititatu sha ndhindhilikwa miitopolwa yomonooli, muule ashike womasiku omasiku taga yalulwa.
Petameko lyoshiwike shika, onzonkundaneki ndjika oya kundaneke kombinga yomagumbo gaali ga yooloka ngoka ga pi po komulilo momukunda Onyati C osho wo momukunda Onanghenene tadhi adhika moshikandjohogololo shaNyaanya, moshitopolwa shaShikoto.
Moonkundathana noThe Namibian mOmaandaha, kansela gwoshikandjohogololo shaNyaanya, Gideon Shikomba okwa popi kutya omililo adhihe ndhoka dhopaali odhe etithwa kaanona mboka kwa li taya dhanene uupalwa omanga aakuluntu kaaye po.
“Egumbo limwe olyo momukunda oNaghenene, lyomusamane Nafitali Ndhila, nolya li noondunda hetatu dhomwiidhi ndhoka dha yangatithwa po niinima ayihe mbyoka ya li mo oya lungwina po thilu mwa kwatelwa oombete, omakumbatha, iikulya, iikutu osho wo oodokumente dhawo dhopashigwana. Megumbo oya kala mo kumwe ye li 14,” osho kansela a popi ngaaka.
“Ngame megumbo kanda li mo pethimbo lyoshiningwanima. Onda tseyithilwa owala pangodhi kutya egumbo lyandje olyi li kohi yomulilo,” osho meme Christofina Ndhila a popi ngaaka.
Kansela Shikomba okwa popi kutya egumbo ekwawo olyomusamane Ndiyoya Ndemuongela, ndyoka tali adhika momukunda Onyati C noondunda dhomwiidhi hetatu dhomegumbo ndyoka odha thigwa momutoko.
“Megumbo ndyoka omu na aanona 17,” osho a popi ngaaka.
Okwi indile aasamaria aanamutimahenda ya kwathele omagumbo ngoka gopaali mpoka taya vulu, nomakwatho otaga vulu okupitila kombelewa ye.
“Alikana tu kwatheleni aanegumbo mboka ya kanithila mo iinima yawo ayihe, mwa kwatelwa aanona mboka ngashingeyi kaaye na we omizalo dhosikola,” osho Shikomba a popi ngaaka.