Aanangeshefa yOswapo ya tyapula esindano momahogololo ga zi ko

ONGUNDU onene yAanangeshefa yOswapo, mOshana, Omusati, Ohangwena nOshikoto mOsoondaha ya zi ko, oya li ya longekidha po oshituthi shokupandula nokusimaneka esindano lyOswapo momahogololo gOpaupresidende nogOshigongi shOpashigwana ngoka ga ningilwe mu Novemba omvula ya zi ko
noga sindanenwe po kOngundu yawo nomake ogendji.

Taya ti otaya pandula wo sho Oswapo ya sindana po oshipotha shoka sha li sha tulwa mOmpangu yOpombanda kOongundu dhOmpilameno kutya momahogololo omwa li omaulingilingi. Dha li dha indile kutya ga yalululwe nenge naga ekelwehi. Oshipotha shika osha ekelwahi kwali mOmpangu yOpombanda omasiku ga zi ko.Aanangeshefa mbaka oya tomene ondumetana onene ndjoka ya tyapula konima yomaashinga yawo mOondoolopa ngashi mOshakati nOngwediva mOsoondaha moka. Oshituthityapulo oye shi ningila pOmugongo gwOosipitikopa lwopOpelicana mElyambala mOngwediva.Omunangeshefa gwopOshikuku nOshakati tate Wellem Kashupia tseyika nedhina Appolo Eleven, mokupopiwa naye kOshifo shika, ota ti kutya yo ongaanangeshefa yOswapo moNooli oya kala noye li taya yambidhidha Ongundu yawo yOswapo noonkondo adhihe opo yi kale tayi sindana momahogolo ngashi ya sindana nomake ogendji momahogololo ga zi ko. Ta ti taye shi ningi molwashoka Ongundu yOswapo oyo ya eta po ombili, engungumano, edhiminathanepo nesimanekathano moshilongo nomokati koshigwana sha Namibia, na oyo ashike wo tayi vulu okukwatela po iinima mbyoka. Ta ti, omolu ombili nengungumano ya tulwa po kEpangelo lyOswapo, aanangeshefa, kutya nee oyomboka yomeni nenge mboka yopondje, oye na lela ehalo enene lyokutunga nokungeshefa moNamibia, oshoka omu na ombili, engungumano nehumokomeho.Tate Kashupi ta kumagidha Aanamibia ya kwatele po nawa ombili,edhiminathanepo nengungumano ndyoka lya etwa po kOngundu yOswapo. Ta ti kutya ngele otatu kondjithathana nena moshilongo itamu kala ombili nehumokomeho.