Aanangeshefa yomonooli ya hala ‘nguungula’ a hulithwa po

Omahangano gopaali gaakalelipo yaanangeshefa oga zi mokalungu kutya oga hala epangelo lya kutha ko oongaku mekondjitho lyepititho lyomahooli ngoka haga zi koAngola, nohaga landithwa nokulongithwa kaaniihauto oyendji, unene tuu mboka ye li monooli yoshilongo, popepi noongamba dhaNamibia naAngola moshitopolwa shaHangwena.

Ehanganokalelipo lyaanangeshefa lyedhina Namibia Local Business Association (Naloba) osho wo ehanganokalelipo lyaanangeshefa yomahooli lyedhina Fuel and Franchise Association of Namibia (Fafa) oga gongala mOngwediva oshiwike sha zi ko okukundathana kombinga yomashongo ga taalelwa kaanangeshefa mboka haya landitha omahooli paveta, unene tuu kombinga yuupyakadhi womahooli ga Angola ngoka haga yakelwa moshilongo. Moshigongi shoka oyi indile epangelo li kuthe ko oongaku nokutumina aakwiita opamwe naapolisi koongamba dhaShikango, opo ku shilipalekwe kutya epititho lyomahooli okuza koAngola olya kandekwa.

Iiyemo yaanangeshefa yomahooli monooli yoshilongo, unene tuu moshitopolwa shaHangwena, otaku hokololwa ya shuna pevi naanangeshefa oya popi kutya otaya nana nondatu pakumona iiyemo molwashoka aaniihauto monooli yoshilongo otaya longitha omahooli ga ‘ngungula’ ngoka ge na ombiliha. Omupevipresitente gwaNaloba, Peter Amadhila, okwa popi kutya epangelo olya pumbwa okukondjitha onkalo yepititho lyomahooli pakutumina aapolisi naakwiita koongamba, taku longithwa naanaa omulandu ngoka kwa li gwa longithwa pakutumina aapolisi naakwiita kEtosha okukondjitha uukongo waali paveta womayego goompanda, osho wo pethimbo lyoondjindikila dhekondjitho lyombuto yocorona sho epangelo kwa li lya tumine aakwiita naapolisi moshigwana opo ku kondjithwe etaandelo lyombuto.

“Epangelo nali tumine aapolisi naakwiita koongamba ku kondjithwe eyakelo lyomahooli moshilongo,” osho a popi ngaaka.

Gumwe gwomaanangeshefa mboka ya li moshigongi okwa yambidhidha edhiladhilo lya Amadhila, sho a popi kutya aaniilonga yalwe yegameno ngaashi aakwiita oye li owala omutumba kOvenduka, taya li nokunwa omanga pu na uupyakadhi tawu vulu okukandulwapo uuna ya thikama. Amadhila okwa popi kutya minista gwiikwamina niikwankondo Tom Alweendo okwa talela po oongamba lwiikando oyindji, ashike kapu na shoka sha ningwa po sigo onena okukandulapo uupyakadhi wepititho lyomahooli. “Minista okwa li i ithanwa a tale uupyakadhi, noshikumungu shoka sheyakelo lyomahooli moshilongo oshi li uupyakadhi wa palamena oshilongo ndele epangelo otali ti kali na shoka tali ningi po. Inandi mona nale epangelo tali popi kutya itali vulu okuninga po sha,” osho a popi ngaaka.

Okwa popi kutya itashi taambiwa ko okuyamukulwa kutya itali ningi po sha okugamena oongamba osho wo epititho lyomahooli moshilongo.

“Sho osho nee tu wete kutya (Alweendo) iniitula mo shili. Opu na lela okuningwa sha. Oongamba ndhoka odhoshilongo niinima mbyoka tayi pitithwa shaali paveta mwa kwatelwa omahooli, oyi na okukandekwa, naangoka ta vulu oku shi ninga, epangelo,” osho a popi ngaaka. Omupopiliko guuministili wetanga lyegameno Peter Shilumbu okwa popi kutya itati ko sha molwashoka oshikumungu shoka inashi etwa ko natango kombelewa yawo.

Omukuluntu gwopolisi moshilongo, Joseph Shikongo inatya ko sha komapulo ngoka a tuminwa konzonkundaneki ndjika. Mboka ya li moshigongi, unene tuu ooyene yiitaasi yomahooli, oya holola okwaauvanawa kombinga yepangelo ndyoka itaali ningi po sha shomupondo okungungumaneka onkalo yaaniihauto mboka taya ka nwetha iihauto yawo poongamba. Moshigongi moka oya toto po okomitiye ndjoka ya ningi omathaneko goku ka tsakanena naAlweendo muule wiiwike iyali twa talela opo ya gandje omanyenyeto gawo kuminista ku yapukilwe omukundu gwepititho lyomahooli.

Okomitiye ndjoka oya thikama po, nomupresitente gwaNaloba Erastus Shapumba, Amadhila, omunashipundi gwoFafa, Deklen Viviers osho wo omupevi gwe Michael Ludeke.

Iilyo yilwe ya gwedhwa po otayi ka tseyithwa nale.

Omolwonkalo yomahooli ga kala nokulonda omimvo dha piti, aaniihauto oyendji monooli yoshilongo oya kala taya mbombolokele kOshikango oku ka landa omandini gomahooli nokunwetha iihauto yawo omahooli gombiliha ngoka taga yakelwa moshilongo okuza moAngola.

Nonande ongaaka, Uuministili wIikwankondo nIikwamina, owa kala aluhe nokulondodha aaniihauto ya yande okulongitha omahooli gaAngola molwashoka anuwa inaga dhindwa nawa noge na uuwinayi mewangandjo.

Uuna aaniihauto ya yi poongamba dhopokati kaNamibia naAngola, ohaya tsakanekwa kaagundjuka oyendji mboka ye na uundini womahooli taya nguungula okwiihakana ookastoma dhomahooli, noyendji ngashingeyi omahooli ngoka oye ga luka nguungula.

Omumvo gwa zi ko sho onzonkundaneki ndjika ya talelepo aagundjuka mboka haya landitha omahooli poongamba oya popi kutya omahooli gopetrol ngoka ga za koAngola ohaga landithwa kooN$400 mendini lyoolita 25, omanga godiesel ohaga kotha ooN$320 mendini lyoolita 25.