Aanangeshefa yAapakistana ya gandja omagano koSwapo

AANANGESHEFA yAapakistana yOfaabulika FATIMA Plastics Manufacturing Company, pOshikango moHelao Nafidi moHangwena, Omaandaha oya gandja omagano giikwaniipangitho yomahogololo yongushu yoodola N$2,5million koSwapo, sha ningilwa pOmbelewa yongundu ndjika mEenhana.

Omagano ngoka ga gandjwa mpoka kAanangeshefa mbaka yAapakistana, oga thikama muustika (Stickers) wu li 80,000, uupandela wOswapo uushona wu li 30,000, omapandela omanene gOswapo ge li 20,000, uumbindja wOswapo wu li 5 040, uutenda wokutula ko iipatululo wu li molwaala lwOswapo wu li 10,000, Plastic Badges 10,000, Ribbon Badges 5000, Omaposta ge li 10,000 noshowo Flex Board 1000.Pethimbo nee ta gandja omagano ngaka komupresidende Pohamba, omusamane Saeed okwa ti kutya oya pandula noonkondo Omupresidende Pohamba sho e ya mwene a taambe ko omagano gOswapo ngeyi. Ta ti oye shi ningi omolu ekwatathano ewanawa ye li na na Kaansela gwa Ndobe tate Mandume Pohamba. Saeed ta ti mOkampani yawo omu na Ehangano lyOnkalonawa yOshigwana na, olyo lya tokola okugandja omagano ngaka, gongushu yOomiliona mbali oshinkwanu ntano kOswapo, molwashoka olye shi tala ko nawa nolye shi dhimbulula kutya Oswapo oyo ashike Ongundu yOpolotika ya Namibia tayi vulu okulela nawa Namibia noshigwana she.Omusamane Saeed ta ti, halo, lwotango taya kwathele oshigwana sha Namibia. Ta ti omathimbo ga zi ko oya kala taya kwathele ngashi Oosikola oku dhi pa, Ookuoompiuta, iipundi, omizalo dhaanona yOsikola noshowo okukwathela oosipana dhomatanga gokoompadhi nosho tuu.’Onda hala oku shi popya mpaka kutya tse aanangeshefa Aapakistana otu uvitile ombili nenyanyu Ompresidende Hifikepunye Pohamba nEpangelo lye lyOswapo molwashoka oli na omilandu nomalandulathano omawanawa gUunangeshefa kumwe naanangeshefa yopondje yoshilongo.Omupresidende Hifikepunye Pohamba, ngoka a li pamwe nooministeli dhe, dhimwe noshowo aaleleli yamwe yoSwapo okwa pandula noonkondo Aanangeshefa yAapakisatana mbaka noku ya lombwela kutya omagano ngaka giikwaniipangitho yiikonga yOmahogolo oye ya lela pethimbo lyoopala moka oshilongo shuuka momahogololo gOpaupresidende nogOshigongi shOpashigwana.