Aanangeshefa ya talela po Oshitayi sha Unam mOngwediva

ONGUNDU yaanangeshefa moNooli oshiwike sha zi ko oya li ya talele po Oshitayi sha Unam shUuwindjinia mOngwediva mOshitopolwa sha Shana noku shi yambidhidha nokapandi kOodola/N$16,900.

Aanangeshefa mbaka oya ka talela po Oshitayi sha Unam shika pehiyo lya Meya gwondoolopa ya Ngwediva Erastus Uutoni ngoka e li Opatrona yOshiketha shokuyambidhidha aalongwa mOshitayi sha Unam shUuindjinia shika shomOngwediva.Pethimbo ta taamba aanangeshefa mbaka mOshitayi shika sha Unam, Meya Uutoni, okwa ti kutya ye nElelo lya Ngwediva kumwe noshigwana shomOngwediva otaya pandula noonkondo aanangeshefa sho yi inekela mondoolopa ya Ngwediva nElelo lya mo na itaya ongaonga nande okuyambidhidha mOoprojeka dhehumokomeho mOngwediva nenge okutunga nokupungula mOngwediva. Ta pandula aanangeshefa ayehe mboka ye ya okutalela po Endiki lya Unam lyUuwindjinia ndika mOngwediva, unene tuu sho ya tokola okuyambidhidha aanasikola yomEndiki moka noshimaliwa. Uutoni ta ti eithano lye lyaanangeshefa kOshitayi sha Unam shika shUuwindjinia sha Ngwediva oyee yi italele ko yoyene nkene sha tya na nkene tashi longo iilonga ya simana yokulonga oshigwana sha Namibia shokomongula Uunongononi wopaindjinia wi ili nowi ili. Uutoni ta lombwele aanangeshefa mbaka kutya Oshitayi sha Unam shUuwindjinia shika ngeno inashi holoka po ngele Omukokolipresidende Sam Nujoma ka li a eta po edhilaadhilo ndika lyoku shi tota po mOngwediva. Meya Uutoni ta ti kutya momumvo 2004, Omukokolipresidende Sam Nujoma, ngoka e li Omukuluntu gwOuniversity ya Namibia (Unam) okwa li a tula miilonga Oshiketha shIimaliwa shedhina ENGIMED opo mu kale tamu tulwa iimaliwa kEpangelo noshowo kAanangeshefa, kOmahangano nokoohandimwe nelalakano lyokutota po Oshitayi sha Unam shUuwindjinia nUuyelele wOpaunongononi. Oshiketha shika sho sha totwa po osha mono ekwathelo enene lela okuzilila maagandji yOoshali, moka Elelo lya Ngwediva lya gandja mo ehala enene pu tungwe Oshitayi sha Unam shUuwindjinia nOmauyelele gOpautekenika. Omupresidende pethimbo ndyoka, Sam Nujoma, okwa pandula edhilaadhilo netokolo lyElelo lya Ngwediva Oshitayi shika shi tungwe mOngwediva nosha tameke okutungwa mo, ngashi mu shiwite nomeho geni ngeyi. Uutoni ta ti kutya Endiki ndika lyUuwindjinia ngele olya pu alihe okutungwa otali ka kutha po okapandi kOodola dha Namibia Oomiliona omathele gatano (N$500,000,000), nokwa tegelelwa shi kapwe okutungwa momumvo 2015 lwaampoka ngele ayihe oya ende nawa.Uutoni ta lombwele aanangeshefa mbaka kutya iimaliwa mbyoka ya tumbulwa metetekelo oyi na sha ashike netungo lyolyene lyEndiki ndika lyEilongo, na kayi na sha niimaliwa yokwiilongitha aalongwa mboka taye kiilonga mOshiputudhilo shOpombanda shika.. Uutoni ta ti aanona oyendji tayi ilongo nenge taye kiilonga mOshitayi sha Unam shika shUuwindjinia, kaye na iimaliwa ya gwana okufutila iinima yimwe pethimbo lyeilongo lyawo ngashi unene omahala gokulala, iikulya noshowo Omambo gokulesha nuushikependjewo wi ili nowi ili. Shi li ngawo kutya yamwe yomaailongi moka, tashi vulika oyendji nokuli, oya za mOofamili dhaa na iiniwe nawa noya pumbwa nee ekwatho lyoshimaliwa. Meya Uutoni ta ti, Namibia okwa pumbwa Eindjinia pamithika dhi ili nodhi ili, onkee Oshitayi shika shUuwindjinia sha Unam osha pumbiwa noonkondo naailongi mboka tayi ilongele mo oya pumbwa okuyambidhidhwa noonkondo.