Aanangeshefa moshitopolwa sha mOshana ya pandula Opolisi yawo

AANAGESHEFA moshitopolwa sha Shana oya pandula noonkondo Opolisi yawo yomoshitopolwa sha Shana sho ya longa nawa muule womvula ya zi ko.

Ong’olupandu, aanangeshefa moshitopolwa shika oya gandja Ekopi enene lyesimaneko nolyepandulo ku Kakukutu kOpolisi ya Namibia Ndjayi Sebastian Ndeitunga noshowo ku Komanda gwOpolisi moshitopolwa sha Shana Komfala gwOpevi gwOpolisi Ndahangwapo Kashihakumwa nokOmupopiliko gwOpolisi moshitopolwa shika,Shisaande Christina Fonsecka.
Opolisi ya Shana ohayi longele kumwe noshigwana noonkondo, na nayo oya tokola okuganja omapandulo pamukalo gwOonzapo kuyamwe yomaakwashigwana, unene tuu yomaanangeshefa mboka ya longela kumwe nawa nOpolisi noku yi kwathela paempito dhi ili nodhi ili muule womvula ya zi ko.
Omakopi noonzapo ndhika odha gandjelwe nee kooyene pethimbo lyOpaati yEhulilo lyokOmumvo 2008 ya longekidhilwe po kOpolisi mOshakati,ya ningilwa mOhotela Oshandira mOshakati komatango geti 17 Desemba 2008.
Oshiithanene shoka, sha li sha wilikwa ku Shisaande H.Nangolo, osha li sha popithwa ku Kakukutu kOpolisi ya Namibia Ndjayi Sebastian Ndeitunga, ngoka oshipopiwa she sha leshwa ku Komishina gwOpolisi Nickey Endjala.
Oshiithanene osha popithwa wo ku Gavena yOshitopowla sha Shana omusamane Klemens Kashuupulwa, Ku Komanda gwOpolisi mOshana Komufala gwOpevi gwOpolisi Ndahangwapo Kashihakumwa, mu Chief Inspecta Karel Thron noshowo kOmukuluntu gwo NBC Oshiwambo me Helena Shiimbi, kOmunangeshefa mwene gwOkefe ya tseyika nawa Rocha Restaurant nOhotela ya Rocha pOshikango tate Antonio Manuel Cerveira Rocha, kOmuhiki gwOongalo Ludex (Thomas) Kalunde nomapandulo ku Chief Inspector MosesKashala.
Moshipopiwa she shoka sha leshwa pehala lye ku Komufala gwOpolisi Endjala, Ndjayi Ndeitunga okwa ti kutya omvula ndjika ote yi dhimbulukwa noluhodhi olunene molwashoka Uuministeli wawo owa kanitha omapenda, gOoministeli yOpevi yEganeno nEpopilo lyoshigwana meni lyoshilongo omusamane Gabes Shihepo, Ndjayi Tuweefeni M`lukeni, Chief Inspecta Golden Naanda noyaakwawo yalwe oyendji.
Ndjayi Ndeitunga ta indile kwaamboka ya li moshiithanene shoka ya thikame noya gandje oamwe naye esimaneko lya hugunina kwaayehe yomUuministeli wawo ya tetekela muule womvula ya zi ko. Ndjayi Ndeitunga ta pandula Opolisi ye sho ya longa nuudhiginini muule womvula ndjika.
Ta pandula wo oshigwana sho sha longela kumwe nOpolisi nawa nelalakano lyokuvudha mo uulingilingi niimbuluma ayihe moshilongo. Ta pandula aanangeshefa yomIitopolwa yi ili noyi ili, unene yomOshaitopolwa sha Shana sho ya longela kumwe nawa nOpolisi mevudhemo lyiimbuluma moshilongo. Ndeitunga ta indile koshigwana ashihe sha Namibia shi tsikile nokulongela kumwe nOpolisi ngeyi opo ku kelelwe uulingilingi niimbuluma moshilongo.
Tate Ndeitunga ta halele Aanamibia ayehe Okrisimesa ya yambekwa nomumvo omupe gu na elago.
Gavena yoshitopolwa sha Shana tate Klemens Kashuupulwa naye okwa pandula Opolisi noshigwan shomOshana sho ya kala taya longele kumwe nawa muule womvula ya zi ko.Ta lombwele Opolisi kutya yi longe nuudhiginini noyi kwate mboka inaya hala okuvulika kOveta ndele taye ya patele mo nokufalwa kompangu ya ka pangulilwe omayono gawo ngoka. Komanda yOpolisi ya ShanaKashihakumwa, naye okwa pandula noonkondo Opolisi ye mOshana sho ya longa nuudhiginini muule womvula ya zi ko.
Ta pandula noonkondo wo oshigwana shoka sha kala tashi longele kumwe nOpolisi ndele tayi shi pondola okuvudha mo uulingilingi niimbuluma oyindji moshitopolwa. Ta indile koshigwana shi tsikile nokulongela kumwe nOpolisi ngeyi opo Oshitopowla sha Shana shi ka hokololwe oshitopolwa shaana we iimbuluma.
Kashihakumwa ta ti aaningi yiimbuluma aanene moshitopowla sha Shana oya kwatwa po, oye li konima yekumba naamboka ashona inaya kwatwa natango onkee taya matuka po omutenya nuusiku, nOpilisi oyi yali mokashoko.
Miipopiwa yawo, Omukuluntu gwo NBC Oshiwambo Helena Shiimbi nomunangeshefa tate Antonio Manuel Cerveira Rocha, nayo oya pandula iilonga yuupenda tayi longwa kOpolisi ya Shana.
Taya uvaneke kutya yo otaya ka tsikile neitulomo enene okulongela kumwe nOpolisi noku yi kwatha mpoka tayi pula omakwatho.

*Taleni omathano kombinga yoshituthi shika pepandja: 22