AaNamibia yambidhidheni iilongwamo yokomake yomoshilogo

EHANGANO lyo Dorkambo Cooperative ndyoka li na ofaabulika o yokulonga omamate pOniipa mOshitopolwa shaShana, olya ningi eshongo kAanamibia mwa kwatelwa iikondo yEpangelo noshowo yopaumwene opo ya kale noku yambidhidha iilongomwa yomoshilongo unene tuu mbyoka ya longwa komake, ngele otwa hala oku yambulapo eliko lyoshilongo shetu tse tu tsakanithe ondjodhi thaneko yopashigwana yo2030.

Sho a li ta popi nomutoolinkundana pofaabulika yawo kuyele, Sheyanena Samwel, omukuluntuwiliki gwehangano ndika oku ulike uuntsa miilonga yehangano lye sho tali kambadhala okukalekapo uukalinawa woshilongo shetu mokulongitha iilongithomwa yopaushitwe ihe haambyoka ya longa kaantu tayi hanagulapo uushitwe. ‘Tse ohatu longitha omafufu goonzi okwweta po nokulonga omamate, iiyala, omagala, iinima yokutula meni nokoothingo dhoondjatha nayilwe oyindjindji. Ndika woo ehangano ndjoka lya lalakanena okukuthapo oluhepo nokuhumitha onkalo yaantu noshilongo shetu mokutsa omukumo iilonga yokomake’, osho Samwel a tumbula.
Dorkambo Coorperative, ehangano lya totwa pOniipa omumvo gwa ziko, lya totwapo kaaniilonga kwali haya longele ehangano lyoDorka Teppitche lya totelwe ku Volker Berner oomvula 28 dha zako koshitopolwa shuushimba. Konima shoBerner a tokola okuya moshipundi shevululuko, nokwa tokola okugandjapo ehangano kaaniilonga ye aakulu peha lyoku ya pa openzela nenge oku ya etha ya ye momapandaanda, ihe mboka ya tokola okupenzelwa oya pewa oshimaliwa shawo noku ka konga oonkalamwenyo dhawo palwe. Aanilonga mboka ya tokola oku tsikila komesho niilonga yoku etapo omamate oyo ye ya nee okutota po ofaabilika yoDorkambo pOniipa.
‘Ota tu pandula Berner mokugandja oshiholelwa neshongo ewanawa kaagandji yiilonga yoshilongo shetu. Ngele omunangeshefa owa gwanitha oshimaliwa nenge a ya moshipundi shevululuko, ngele ina hala okutsikila nongeshefa ye, ongeshefa okwa pumbwa oku yi gandja po kaaniilonga mboka e mu longela ethimbo ele pehala lyokuya pa openzela nenge okuya etha ya ye momapandaanda’, osho Samwel a hokolola omanga ta tumbula kutya Berner okwe ya pe po iilongitho aihe mwa kwatelwa nomashina agehe kwali haga longithwa kofaabulika yaDorka Teppiche nale.
Ofaabulika yaDorkambo ndjoka yi na aaniilonga 27, oya tokola oku yambulapo oontseyo yiilonga yomamate moshilongo moku dheula aagundjuka 17 miilonga mbika oshali okuza muKotoba gwomumvo gwa ziko. Aagundjuka mbaka oyeya kutu woo miilonga yehangano ndika.
‘Onda nyanyukilwa iizemo yomadheulo ngaka. Aagundjuka oyu ulike uunongo wi ikalekelwa, eithikameno mokweeta po sha momadhilaadhilo gawo yene, ondjala yontseyo neitulomo. Iiyala ya longa iiwanawa noonkondo’, osho Samwel a ulike enyanyu kiizemo yomadheulo ya ningi.
Frieda Kumbwa gumwe gwomaadheulwa, okuulike enyanyu lye moku kutha ombinga momadheulo ngaka. Ondi ilonga iinima oyindji mbyoka ka kwali ndishi kombinga yoku longa omamate.
‘Ngashingeyi otandi vulu okulonga emate ngame awike. Ondi ilonga wo oshiindji shi nasha niipindi yomamate’, Kumbwa ta holola nenyanyu ngaaka. Melanie Harteveld-Becker Omuunganeki gwehangano lya Pambili ndyoka hali kwatakanitha omahangano gokulonga niilonga yokomake ngaashi Ohandje Trust, Dorkambo Co-operative nagalwe, okwali a kutha wo ombinga mokudheula aagundjuka mbaka nokuulike enyanyu lye kiizemo yomadheulo ngaka.
Becker okwa holola wo eyeme lye komathigathano ngoka omahangano haga longo iilongomwa yokomake unene gomoshilongo ga taalela. Okwa tumbula kutya ethigathano omahangano gomoshilongo oga taalela omathigathano omanene moku landitha iilongomwa yago oku ziilila komahangano giilongo ngaashi China, South Afrika, India nosho tuu. Iilongomwa yokomake ohayi landithwa unene kaatalelipo nethimbo ndika oongeshefa ndjika oyili ya thinana unene noyi na omathigathano omadhigu.
‘Iilongomwa yokomake ya longwa moNamibia oyina ongushu noyili pombanda, ya kola yo iiwanawa. AaNamibia otwa pumbwa owala okuyambidhidha eithikameno nekoko lyoongeshefa dhika’, osho Berker a tumbula omanga ta indile AaNamibia ya yambulepo iilongomwa yokomake.
‘Ondi wete sha simana okukala tuna iilongomwa yomoshilongo ngaashi omamate ge li momagumbo noombelewa dhepangelo, noshowo momahala galwe shi vulithe oku eta mo iinima ya logwa kiilongo yilwe. Otwa pumbwa okuyambidhidha iilongomwa yetu yene’, Samwel ta ulike eyeme lye konkalo yaantu yoku ha simaneka iilongomwa yoshilongo shetu.
Okwa hokolola kutya oya longekitha epatululo lyopambelewa lyehangano ndika kuyele nuumvo moka naku tota ehangano ndika Berner taka gandja ofaabulika ndjika kooyene aape pambelewa. Oohashikeshalye mEpangelo, miipindi, maakaleliposhilongo noshowo oshigwana ashihe otashi ka hiywa.
Nonando ehangano ndika ohali landitha iilongomwa yalyo kiilongo ngaashi Amerika, iilongo ya Scadinavia, yaEurope na yilwe, iipindi meni lyoshilongo nayo oyu uka komeho.
‘Otatu hiya aakwashigwana, aanangeshefa, noosikola opo yeye yi ilonge sha mofaabulika yetu. Naye ye ya tale kutya okwoodhila, oku unga iiyala, oku mbapeka nayilwe mbjoka haye ilongo kutya oyatya ngiini. Amuhe omwa hiywa mutu talelepo’, osho a tumbula pehulilo.