AaNamibia 900 ye li pondje yoshilongo ota ya hogolola nena

AAKWASHIGWANA aaNamibia ye li pondje yoshilongo ota ya hogolola oku za 7h00 sigo 21h00 ethimbo lya Namibia poombelewa dhaa kalelipo shilongo sha Namibia dhi li miilongo 24 muuyuni auhe.

Shika osho oshikando shotango aaNamibia mboka ye li keilongo,nenge kiilonga miilongo yilwe ta ya mono ompito okuhogolola pondje yoongamba dhevi lyomapendafule.’Otwa tegelela aakwashigwana yetu kuuzilo wokokule, ngaashi koChina na Malysia ya hogolole tango, molwaashoka mbaka oye li komeho nootundi dhontumba okuyeleka nethimbo lyetu noshowo lyiilongo yilwe,’Rukee Tjingaete omugandjimayele miikundaneki gwo Komisi yo Mahogololo ya Namibia a ulike. ‘Mboka ye li muuninginino wuuyuni ngaashi America, Latin America, niilongo yaCaribbean oyo ya tegelelwa ya hogolole hugunina, natango molwaashoka ethimbo lya wo olili konima naandyoka lyetu.’ ‘Otwa pandula kutya ayihe oya longekidhwa nawa, na aanambelewa oya dheulwa nawa oshiwike shayi nkene omahogololo taga endithwa nokuwilikwa moombelewa dhaakalelipo yoshilongo,’Theo Mujoro omuwiliki gwEenditho poKomisi yomahogololo a ti.Poompito dhimwe aaniilonga yoKomisi yomahogololo oyo, ya tumwa ya ka longe iilonga mbika pakathimbo poombelewa dhaakalelipo miilongo yimwe po. Iipumbiwa ayihe yomahogololo oya tuminwa nale komahala ngaka 24 gaa kalelipo. Konyala aahogololi 900 otaya ka hogolola mu Angola, Austria, Belgium, Botswana, Brazil, China, Democratic Republic of Congo,Cuba, Egypt, Ethiopia,France, Germany, India, Malaysia,Nigeria,Russia,South Africa,Sweden,Tanzania,Britain, USA, Zambia na Zimbabwe.Aakwati yoohi naaniilonga yomefuta yaNamibia na yo woo ota ya hogolola nena, opo ya vule okushuna mefuta ya ka kwate oohi.