Aanambelewa yelongo taya fekelelwa ekengelelo

OPWA tegelelwa aaniilonga yamwe ya tidhwe miilonga mUuministeli Welongo, konima sho Okommissi yokukondjitha uulingilingi ya mono omukalo gwokunyokoma epangelo gwoomiliona dhoodola odhindji.

Ombelewa yomutamaneki ndjayi oya ithana aayaluli yaali muuministeli mbuka opo ya holoke mompangu.Mbaka yaali pamwe nomunangeshefa gumwe oya tegelelwa ya holoke mompangu opo ya yamukule kombinga yekengelelo noshowo uulingilingi.Otaku tiwa omuyaluli omukwatheli , Magdalena Shipefi na nomuyaluli , Frieda France otaya ka joinwa komunangeshefa, Martyn Harold Ipinge, noshwo omulongeli kumwe nayo , Stanley Thomas momulongo nagatatu ga April 2010. Otaya tamanekelwa omatamaneko gane guulingilingi, nekotokelo.Oonzo dhepangelo otadhi ti oACC oya mono aniwa kutya mbaka yane oya li taya lundulula uumbapila womafutilo, yo taya kutha mo noku yonagulapo oombapila ndhoka dhili mondjila dhomafutilo dholela. Elalakano lyawo aniwa oku indjipaleka omwaalu ngoka epangelo nenge Uuministeli mbuka wu na okufuta iilonga nenge omayakulo ngoka lya pewa kehangano ndyoka ta li gandja ombapila yomafutilo. Omwaalu ngoka gwa yooloka kwaangoka gwo mbapila yomafutilo otaku kundanekwa kutya ogwa tulwa moondjato kwaamba ye li yane.Mbaka yane otaku fekelwa kutya oya tula moondjato dhawo iimaliwa yoodola omiliona yimwe uule woomwedhi hamano dha piti.Ekonakono moshinima shika olya holola kutya pokati ka Desemba 2007 na May 2008 mbaka yane oya, lipo aniwa iimaliwa oodola omathele 956 365, moku indjipaleka omiyalu doombapila dhomafutilo.Ehangano lya Ipinge lyedhina , Nam Sewerage and Refuse Maintenance ota ku tiwa olya li hali kutha iiyagaya moosikola mOkavango, Oshikoto, Ohangwena no Caprivi lyo ta li futwa kUuministeli Welongo.Thomas aniwa okwa eta oombapila dhomafutilo giilonga ye ku Shipefi poombelewa dhuuministeli.Ope uvitike kutya oombapila dhomafutilo ndhika dha tuminwe ku Ipinge kadhi wetike mo muuministeli.Pompito yimwe aniwa epangelo olya futithwa oodola 482 000 konima sho lya li lya pewa okambapila komafutilo koodola 519 908, omanga ombapila ndjoka yili mondjila ya li yi na ashike omwaalu gwoodola 37 908 ngoka epangelo lya li , li na okufuta.Poompito oonkwawo mbali epangelo olya futithwa sha pitilila noodola omayovi 157 600 noshowo oodola omayovi 168 215.Otaku fekelwa kutya konima yaashika mbaka yane oya topola iimaliwa mbyoka yahupu ko mwaalu ngoka ya li ya indjipaleke.