Aanahambo yamwe mboka ya tidhwa kOkavango ya monenwa ehala

AANAHAMBO yamwe mboka ya tidhwa kOkavango omathimbo ga zi ko kumwe niimuna yawo, ya monenwa ehala kEpangelo moka taya vulu okutula oongombe dhawo muule ashike manga womvula yimwe manga taku longekidhwa ehala limwe ndyoka tali kalelele.

Amushanga gwUuministeli wOmapangelo gOpaitopolwa, Omagumbo nEhumithokomeho lyIitopolwa yokOmikunda omusamane Erastus Negonga ngoka wo e li Omunashipundi gwOkomitiye ndjoka tayi ungaunga noshikumungu shAanahambo mboka ya tidhwa kOkavango ta ti ngawo pethimbo lyoshigongi a ningile nAanafaalama pOndangwa mEtitano lya zi ko.
Omusamane Negonga ta lombwele aanahambo mbaka moshigongi shawo shoka kutya Epangelo olya ninga oonkundathana neuvathano nEhangano lya NDC, li gandje Ookamba dhalyo dhi li ne lwaampoka dhokOmangetti mu tulwe oongombe dhaanahambo yamwer mboka ya tidhwa kOkavango dhi li omayovi gane (4000) lwaampoka, dhi kale mo ashike manga uule womvula yimwe, manga taku longekidhwa ehala lyoofaalama tali kalelele.
Omusamane Negonga ta lombwele aanahambo mbaka kutya Epangelo pokati mpoka olya gandja elombwelo kUuministeli wOmavi nOmatulululo wu tameke nokukonaakona ehala lyomaulithilo lya Mangetti muuzilo wOndonga moshitopowla sha Shikoto noshowo muuzilo wUukwanyama mOshitopolwa sha Hangwena.
Uuministeli mbuka wu tale mboka ye na oofaalama oonene dhi vulithe peebinekilometa dhi li hamano ndhoka dha gandjwa kwali, unene kElelo lyOndonga palongelokumwe nOmalelo gIitopolwa mbyoka iyali.
Tashi ti mboka ye na oofaalama oonene dhi vule po poobinekilometa ndhoka hamano, osha yela kutya otaya ka tendululwa.
Oofaalama dimwe dhomOmangette odhi na Oobinekilometa dhi vule po mpoka.
Dhimwe taku tiwa kutya odhi li nokuli poobinekilomata, 20, 15 noshowo 10 nenge hetatu lwaampoka. Adhihe nee ndhoka odhi na okutendululwa, opo ku monikile omahala mboka pethimbo ndika kaye na omahala noya li ya thiminikwa ya taaguluke ya ka ninge oohambo muuninginino wOkavango, ano mUukwangali wOmukwaniilwa tatekulu Sitentu Mpasi, moka ya tidhwa kuyele nuumvo.
Otaku tiwa kutya Aanambelewa yUuministeli mbuka woOmavi nOmatulululo oko nale ye li kOmangetti hoka taya konaakona nokuthaneka.The Namibian okwa kundana kutya yamwe nenge ayehe yomAanafaalama mboka ye na Oofaalam kOmangetti dha gumwe ketendululo ndika, kaye uvite ombili.
Taya ti kutya Uuministeliw Omavi nOmatulululo, owa ya ashike kOofaalama dhawo hoka nokulonga ngawo inau ya lombwela.
Yamwe otaya ti kutya otashi vulika ya ka fale enyenyeto lyawo ndika kOohahende dhawo.
Shi na sha nee nOokamba dha NDC, nompito ndjoka ya pewa aanafaalama yamwe mboka ya tidhwa kOkavango, omNegonga ota ti kutya oofaalama dhimwe kadhi li mondhalate, na NDC okwa pewa Oodola dha Namibian Oomiliona 3,5 a tule oofaalama ndhoka dhoonomola, 8,7,13 no 14 mondhalate muule wOomwedhi ne tadhi landula.
Aanafaalama yoyene mboka ya tidhwa kOkavango oye li aniwa ayehe kumwe 57. ye li 37 oye li iilyo yEhangano lyAanafaalama yAawambo mboka ya kala taya litha mOkavango omanga ye li 20 kaye shi iilyo.
Negonga ota ti pamakonaakono ngoka ya ninga po palongelokumwe lyaanahambo mbaka, oshi li ngeyi kutya aanahambo mboka ye li 37 oye na oongombe 5068 lwaampoka kwali omanga mbeyaka ye li 20 ye na dhi li 2562 lwaampoka kwali. Ashike, Negonga ta ti, omwaalu gwoongombe ndhoka otashi vulika gwa shuna pevi. Amushanga gwEhangano lyAanahambo yAawambo taya tidhwa mOkavango, omusamane Vilho Hamunyela(Kabila) naye okwa koleka dha tate Negonga kutya omwaalu gwoongombe ogwa shuna pevi molwashoka oongombe dhimwe odha sa po, dhimwe odha kuthwa po kAakavango sho dha shu na mo, omanga dhimwe ye dhi landitha po.
Omusamane Hamunyela moshigongi omo tuu moka okwa lombwela tate Negonga noshigongi ashihe kutya oye na uudhigu woongombe dhawo tadhi shuna mOkavango notadhi kwatwa po kAakavango noku dhi dhipaga po, nenge
ye ku pule wu dhi futile ko N$2000 sigo N$3000 mongombe.
Kabila ta ti aanahambo yawo oya tila oku dhi landulila mo molwashoka ohaya dhengwa kwaamboka yomOkavango. Negonga okwa gandja oshinakugwanithwa kOpolisi yi konaakone uushili woshinima shika, nange osho, yi landule mboka taye shi ningi.
Aanahambo moshigongi shEtitano shoka, oya indila Negonga kutya napu endelelwe lela moshinima shoka shetulo lyoongombe dhawo mOokamba dha NDC manga kuliwe mokulombo.
Negonga te ya lombwele kutya Epangelo olya tokola toko, omolwaasho nokuli lya tula po kutya muule wOomedhi omalongekidho agehe gokutula oongombe mOokamba dha NDC moka ga kale ga pwa kuningwa.
Ashike ota ti kutya otaya ka konaakona aanahambo mboka ye na oohambo nale muuzilo wOndonga, Uukwanyama.
Ta ti kutya mboka ye na nale oohambo, itaya ka pewa uuthemba wokutula oongombe hawo mOokamba dha NDC dha tumbulwa.
Ta ti wo kutya molwashoka mOokamba dha NDC otamu vulu ashike okutulwa oongombe dhi li 4000 lwaampoka dhomoongombe adhihe kumwe dhi li omayovi gaheyali nasha, ndhoka tadhi ka hupa ko, ooyene yadho otaya indilwa ya tale ngaa mpoka taye dhi tula manga, manga taku ningwa etendululo lyOofaalama.
Oshigongi osha li sha kalwa, kAakalelipo yElelo lyOndonga, lyAukwanyama nolyaAukwangari noshowo nee yomAuministeli ga pambwa koshinima shika ogendjigendji, ngashi nee mboka wOmapangelo gOpaitopolwa, Omagumbo nEhumithokomeho lyIitopolwa yokomikunda, mboka wu li Uunashipundi, Uuministeli wOmavi nOmatulululo, Uuministeli wEgameno nEpopilo lyoshigwana meni lyoshilongo, Uuministeli wEgameno, Uuministeli wIilonga nOmaenditho, Uuministeli wOmauyelele nOmakwatakanitho gOpautekenika, Omalelo gIitopolwa ngashi Okavango, Oshikoto nOhangwena.
Oshigongi tashi landula otashi ka kala ko meti 24 Desemba 2008 pOndangwa tuu mpoka, ano moshinyanga shaayehe shopOluno mOndangwa moka mwa li shoka shomEtitano.