Aanafaalama yokOmangetti otaya ka ‘boikota’ oshigongi

IILYO yEhangano lyAanafalama yokOmangetti itayi ka ya moshigongi sha longekidhwa kUuministeli wOmavi nOmatulululo, tashi ka ningilwa pOombelewa dhElelo lyoshitopolwa sha Shikoto mOmaandaha ngaka twa thinda, ngele Uuministeli mbuka otau ka popitha Elelo lyOpamuthigululwakalo lya Ndonga niilyo yehangano lyaanafaala ndika piigongi ya topoka.

Pethimbo lyoshigongi shehangano ndika sha li pOluno mOlyomakaya ga zi ko, Omunashipundi gwehangano omusamane Ismael Shailemo okwa li a popi kutya elalakano lyoshigongi olyali oku kundathana ombapila kehiyo lyoshigongi shoka Uumunisteli wa hala okuninga nayo mOmaandaha.
Ihe Shailemo okwa ti opwa monika uuyelele kutya aanambelewa yUuministeli aanafaalama mbaka taya ka popithwa pomutenya shoka.Ihe elelo lyehangano lyaanafaalama ya Mangetti oshinima shika ine ye shi hala. Ano oyehe yab kala ashike moshigongi shimwe. ‘Otwi ithana oshigongi shika opo tu kutheni etokolo ong’aanafaalama,ngele oshu uka tuu oku kundathana iinima yi na sha noofalama dhetu twa topolwa nElelo lyopamuthigululwakalo lya Ndonga, ndyoka olyo lye tu pa oofaalama dhoka,’ Shailemo osho a popi ngaaka. Aanafaalama ya Mangetti oyu uvitile wo nayi edhilaadhilo lyEpangelo okutendulula oofalama dhawo muutopolwa, opo mu monenwe omahala aanafaalama mboka ya tidhwa kUukwangari mOkavango. Shika oye shi tala ko ong’omukalo gwokuya yeka evi lyawo ndyoka ya pewa paveta kElelo lya Ndonga. ‘Shika otashi ulike kutya Epangelo olya hala okulongitha omukalo gwokutopola nokulela. Omolwashike ya hala okukundathana natse twa topoka nElelo lya Ndonga, ngele ota tu ka kundathana oshinima shimwe? Muka hamo taya eta aanafalama mboka ya tidhwa mOkavango, tse hatse twa eta po omukundu nguka. Naye ye ya ukithe koofalama dhokevi lyaayehe hoka kuna oofaalama oonene,’ Shailemo ta popi. ‘Tse meefaalama dhetu omu udha nale nayi iimuna sha pitilila, Epangelo nalyo oli shi shi. Ongiini mbela ngele otwa gwedhwa kiimuna mbyoka ya tidhwa mOkavango?’,Martin Haikali, oshilyo shEwiliko lyehangano ndika, ta pula ngaaka. Haikali okwa yelitha kutya ngashingeyi moshitopolwa shaShikoto naHangwena omu na aaniimuna 700 lwaampoka, taya ka pumbwa uupambu woofalama u li 700. ‘Otau ka monika tuu?,’ ta pula. Okwa ti hwepo Epangelo li longitthe oofalama mevi lyaayehe omo mu katulululwe mboka ya pumbwa evi. Aanashigongi oyu ulike wo eyeme lyawo mwaashoka ya tala kutya eteyopo lyoodhalate dhoofaalama dhawo komambakuku gUuministeli wIilonga nOmakwatathano koshitopolwa shaMangetti noofaalama dha NDC opo li tule po ontaula yoongamba pokati kOwambo nale na Kavango. Shika oyeshi geela oshoka ooyene yoofaalama inaya kundatahnwa nayo dho oodhalate meni lyaKavango inadhi gumwa. Shika oyati, otashi ulike odhino kelelo lya Ndonga ndjoka lye yape omavi omanga taku simanekwa elelo lyUukwangari. Oshigongi osha tokola neee kutya ngele Uuministeli owa tokola oku ka popitha omalelo ngaka gaali ga topoka, aanafaalama yokoMangetti koshigongi huka itaya ka yako. Oya tokola wo kutya otaya ka ithana Oominista mbali: yOmavi nOmatulululo naandjoka yIilonga nOmakwatathano ya ka kundathane omukundu gwawo, ashike oya hala okukundathana nOominista yoyene. Oya tokola wo kutya oshizemo shoshigongi shika otaye ke shi fala kOmukwaniilwa Kauluma Elifas ye mu lombwele etokolo lyawo.