Aanafaalama taya nyenyeta EPan-gelo tali tete po oondhalate dhawo

A
ANAFAALAMA yOofaalama dha kunkula nongamba yOwambo nOkavango, kombinga yOwambo, nenge tu tye dha kunkula noongamba yOshitopolwa sha Hangwena nOkavango nOshitopolwa sha Shikoto nOkavango, ndhoka dhi li mOondhalate,oya geela noonkondo Epangelo sho lya tameka okutetagula po oondhalate dhawo nomambakumbaku, sho tali kokola ehala enene lyoometa 60 lwaampoka muunene nolyuule okuza kOtsintsabis sigo omohuke yomondjila onene ya Kongo noRundu moNooli ya Tsintsabis.

Yamwe yomaanafalama mbaka ngashi unene tate Martin Haikali noshowo tate Josef Nakale a shiwika nawa nedhina Oom, ye na oofaalama dhawo pEloolo, otaya ti kutya oofaalama dhawo, dha gama unene kongamba yOwambo nOkavango, odha gumwa nayi ketauwa ndyoka tali kokolwa okuza kOtsintsabis lya thinda kuumbangalantu. Otaku tiwa kutya otali ningwa po ku Road Authority, ano kOshikondo shOondjila.
Oshikondo shika otaya ti kutya inashi popya nayo. Osha tameke ashike kusho shene nokuninga etauwa ndyoka nokutetagula oondhalate dhaanafaalama mboka ye li mondjila yalyo.
‘Inatu pulwa sha nande. Otu wete ashike sho Epangelo tali ningi po etauwa ndjoka nokuteagula ngawo oondhalate dhetu, twe dhi landele niimaliwa yetuyene. Tala ashike sho oondhalate dha lala noopaala dhetu dha teyagulwa po kEpangelo, inali tu lombwela sha nan de, inali tu pula sha nande,’ Haikali na tate Oom taya ti ngawo meti 28 Febuluali 2009 sho The Namibian a li e ke ya talela po esiku ndyoka kehala lyawo hoka.
Aanafaalama mbaka otaya ti kutya sho nee oondhalate dhawo dha tetagulwa po komambakumbaku ngawo, iimuna yawo, ano oongombe dhawokadhi li we metonatelo ewanawa. Otadhi zi mo mOofaalama nuupu nokuya mOofaalama nenge mOshitopolwa shomuuninginino nwOkavango, moka tamu tidhwa nale aanafaalama yakwawo mboka aniwa ya yile mehala ndyoka shaa li paveta.
‘Oongombe dhetu odha tameka okukana, unene okukanena muuninginino wOkavango moka tadhi yi molwashoka oondhalate dhetu odha tetwa po kEpangelo owina. Sho nee tadhi yi mOkavango moka otadhi kwatwa kwaamboka yoOkavango notaye tu pula tu dhi futile ko uuna twe dhi mona.
Taya pula tu fute okuza po N$800 sigo opOoN$2000 nenge ngaa nokuli N$4000,’ tate Nakale ta ti ngawo nokukolekwa ku tate Haikali.
Tate Nakale ota ti kutya kuye okwe yile Aanambelewa yokOmbelewa yOmupresidende ye li yaali noku mu pula kutya okuuvite ngiini sho oondhalate ye tayi tetwa po ngawo. Sho aniwa e ya lombwele kutya okuuvite nayi unene, oya ti yo oye yile ashike okuuva kutya yo ong’aanafaalama oye uvite ngiini kOondhalate dhawo tadhi tetagulwa po ngawo.
‘Sigo oompaka, mboka yo Road Authority, kutse inaye ya ko pambelewa ye tu lombwele kutya etauwa ndyoka olya shike na omolwashike ntaya tetagula po oondhalate dhetu ngawo, yo inaya popya natse moshinima shoka,’ Nakale ta ti ngawo.
Haikali ota ti kutya oondhalate dhawo ndhoka oye dhi tula ko
pazimino lyaawiliki yOshitopolwa na kashi li pauyuki nande dhi tetagukwe po ashike ngawo pwaa na euvathano nayo nenge pwaa na ofuto yasha.
‘Tse otuuvite oshinima shika, sha fa tashi yakwa, sha fa kashi shiwike nawa kEpangelo, nange oli shi shi nena, Epangelo itali longo nawa nopauyuki nandenande, ‘tate Haikali ta ti ngawo nokwiindila kOmupresidende Hifikepunye Pohamba noshowo kOmuprima Nahas Angula ya tale mo nawa oshinima shika noku shi konaakona mo nawa, oshoka otashi ehameke unene aanafaalama ya gumwa kusho.
Kupulo, gumwe gwomaanambelewa ya Roads Authority mOnooli, ngoka ina hala edhina lye li tumbulwe, okwa ti oshitopolwa shoka otashi kokolwa mu tungwe ondjila yongalama, okuza ku Tsintabis ya thinda muumbangalantu.