Aampundja ya holola omadhilaadhilo

ONGUNDU onene yaakalimo yomOshikandjohogololon sha Mpundja, oshiwike sha zi ko oya ningi ehololomadhilaadhilo mOshakati, taya nyenyeta Opolisi ya Shana inayi hala okukwata po aalumentu taya fekelwa moshinima shi na sha neso lyokakadhona Elizabeth Isak hoka kiitsuwilwe ka sila momuthima pOponona mOshikandjohogololo shUuvudhiya mOshitopolwa sha Shana meti 07 Oktoba 2009 konima sho , tashi vulika, a umbilwa mo ongulohi yeti 6 Oktoba 2009.

Omukanda gwawo gwomanyenyeto oye gu pa Mangestrata Mika Namweya pOombelewa dha Mangestrata mOshakati, ngoka a ti kutya ote gu tumu kUuministeli mboka wa gumwa koshinima shika.Omukanda, ngoka gwa shainwa kaawiliki yamwe yomOshikandjohogololo sha Mpundja noshaShakatiuzilo, ogwa leshwa ku tate Erastus Kapolo Omupongololi gwOswapo mOshikandjo sha Shakatiuzilo, noku gu pa Mangestrata Namweya.Onakuholola omadhiladhilo mbaka, taya ti kutya oya halukithwa unene koshiningwanima shika nokeso lyomukadhona gwawo nguka Elisabeth, otaya ti kutya okakadhona haka Elizabeth komOmpundja, oka kuthilwe puundingosho wedhina Ompadhi mOmpundja moka kaalumentu yontumba ongulohi yeti 5 Okotoba 2009 noya yi nako sigo Okoponona hoka ka monika kuyamwe uusiku wesiku tuu ndyoka ke li naalumentu yahamano lwaampoka ye shiwike nokomadhina gawo. Ongulohi ndjoka oya lala megumbo lyomulumentu gwomomudhingoloko ngoka, ngoka wo taya ti kutya oye mu shi noye mu tumbula mOmbapila yawo ndjoka ya gandja ku Mangestrata Namweya. Mbaka taya ti kutya sho kwa shi meti 6 Oktoba 2009, omo ya kala mOponona moka noya kakwatele wo noohi pomadhiya ga Ponona mpoka nokonima oya zi po mpoka. Kongulohi lela, aniwa, okwa ka uvika ewi lyomukiintu ta kugu lwopomuthima gu li lwaampoka, nangula kushe, momuthima moka, omwa adhika nee omudhimba gwa Elizabeth. Oonakuhololomadhilaadhilo mbaka otaya ti kutya, oshiningwanima shika oye shi lopota kOpolisi ya Shakati, ashike sigo oompaka inayi ninga po sha, oya mwena ashike nonando ya pewa nawa omauyelele nomaumbangi agehe giihwapo nawa. Oonakuholola omadhilaadhilo taya ti ngele Opolisi itayi ningi po sha, otaye kiikuthila oveta momake gawo yene, ya kwate nenge ya ungaunge naalumentu mboka taya fekelwa meso lya Elizabeth. Taya indile nee kOpolisi yi kwate aantu mbaka meendelelo ngashi tashi vulika nokuya eta komeho gOmpangu ya pangulwe. Opolisi oya ti aniwa yo ita yi vulu oku kwata aafekelwa ngele ka pe oombangi ndhoka dhi ilongekidha oku popya kutya odha mona aafekelwa ta ya umbile nakusa momeya. Opolisi oya ti ishewe kutya omusi nguka sho a tandwa ota ku tiwa osheeti she so lye, osho oku sa omeya.