Aampundja nAamege otaya tutile ondjila yawo ooshako dhevi

OMASIKU ga zi ko, aakalimo yokOmpundja, Omege noshowo komikunda ndhoka oya kala ya tetwa ko kOshakati konima sho okantopa komundjila onene ya Shakati nOmpundja pOkakukiipupu popepi nOshakati lwopetale lya Mbango lwaampoka ka kungululwa po komeya.

Sho ka kungululwa po komeya ngeyi,Kaansela gwOshikandjohogololo sha Shakatiuzilo tate Loth Kuushomwa okwa unganeke aakalimo yokomikunda ndhoka dhokOmpundja, Omege nomudhingoloko ya kembadhale ya patulule ondjila ndjoka pamukalo gwokututila po ooshako dhevi.
Oya yi kOkampani yOkutunga Oondjila nOmagumbo yedhina Nexus ndjoka ya tokola ye ya yambidhidhe nokutula evi lyongalama pontompa ndjoka ya kungululwa po uule woometa dhontumba moshana sha Kakukiipupu mpoka.
Mehuliloshiwike lya zi ko,Kuushomwa naakwashigwana ye mboka na Nexus oya tameke okutula ooshako dhevi pokantopa mpoka puudha omeya taga tondoka mpoka moshana sha Kakukiipupu petale lya Nambango shuudha.
Oya kala nee aakwashigwana taya tutile po ooshako dhevi, lyo embakumbaku lya Nexus tali tula po evi lyongalama, sigo taye shi pondola lela okuthitika po mpoka nokutunga p[p kuyo yene okatompa kopaumwene. Omeya taye ga pangele nokuya ga ka endele kulwe ku ili.
Pamukalo ngoka, okantopa oye ka shuna po nooshako dhevi, nevi ndyoka lya undulilwa po kembakumbaku lya Nexus.Kuushomwa ota ti kutya dhimwe dhomOoshako ndhoka ya tula mpoka, dhi li omathele gatatu lwaampoka, 180 oye e dhi landa ye mwene omanga omukalimo gwomOmege tate Ores Shilunga a landa dhi li omilongomugoyi (90) nadhimwe ya pewa kookuume kawo yalwe.
Omavi ngoka nga tulwa mooshako ndhoka, tate Kuushomwa ota ti ye okwa landa ofulaha yimwe yevi, omunangeshefa Topis ta landa dhi li mbali, omanga Nexus e ya pe ofulaha yevi yimwe noshowo nee okambakumbaku, ano Okalaehalafa hoka ke ya kwathele okufila po omeya ngoka pokatompa mpoka, moshana shoka, konima sho pwa tulwa ooshako ndhoka pokati nomomunkulo gwokantopa hoka.
Sho okatompa hoka ka kala ka kungululwa po, aakalimo yokombinga ndjoka ya Mpundja nOmege oya kala ita ya ende po we niihauto. Ya li ashike taya ende po kolupadhi nuukeka uunene, iihauto yawo ye yi thiga kuumbugantu wontopa noshana shoka.
Oya kala lela ye na uudhigu okweeta aanuuvu yawo koshipangelo kOshakati nokuya yi ilandele iinima yawo kOshakati. Kuushomwa ota ti aakwashigwana oya pandula lela konkembadhala ndjoka ya ningwa po yokushuna po okantopa hoka nooshako dhevi nosho tuu.
Aakwashigwana taya ti kutya nonando hako ngaa naanaa, onkembadhala ndjoka ya ningwa po oyi shi okupandulwa noonkondo lela, oshoka ngashiingeyi otaya vulu okuza kOompundja hoka nokuya kOshakati nenge okuza kOshakati nokuya kOmpundja, Omege nosho tuu komikunda hoka.
Kuushomwa ta ti konima ashike sho ye shi pondola okuyumudha po okantopa hoka, aakwashigwana mboka ya kala ye na oonakusa yawo ye li kOshipangelo shEpangelo kOshakati, oya ka tala ko omidhimba dhoonakusa yawo noku ke ya fumvika mehuliloshiwike ndyoka lya zi ko nombili.
Kuushomwa ota indile kaakwashigwana ya ende po nuukeka pokantopa hoka, unene tuu mboka taya ende po niihauto, oshoka oka ningwa koonyala paulumompumbwe notaka vulu okuyonuuka po ishewe ngele inaka kwatwa nuukeka.
Ta indile kwaamboka kaya toka iinima yaantu ya tulwa pokuma, shaa yake po ooshako ndhoka. Ta pandula noonkondo ayehe ya kwathela mOprojeka ndjika ‘Onkembadhala oyi vule okumwena.’ Ta ti Kalunga ne ya yambeke noku ya shunithile mpoka ya kuthile.
Kaansela gwa Shakatiuzilo tate Kuushomwa ta indile natango kwaayehe, unene tuu kaanangeshefa nokwaayehe yokoshitopolwa shawo shoka ye li kuushiimba nosho tuu ya kwathele mokulanda ooshako dhooleya, ano ndhoka kaadhi na sha, ye dhi tume kOmbelewa ye oshoka nani ngele owa tula mo omavi, oto vulu okukelela nadho omeya nokutungulula nadho uuntopa mboka wa kungululwa po komeya.