Aampumbu nAakandjengedi ya maashinga

AAKALIMO yomOmpumbu na Kandjengedi mOshakati mOshana, mEtitatu lyoshiwike shika oya maashinga taya ningi ehololomadhilaadhilo lyombili ya humbata omaplakate taya pula Meya gwa Shakati Onesimus Shilunga aniwa a thige po iilonga yUumeya oshoka okwa gandja elombwelo omagumbo gawo mOmpumbu, mOkandjengedi noshowo mOnawa ga mbonyagulwe po kumwe nOkinde yawo mOmpumbu.

Omashinga oya li wo ya kwatela mo uunona wOkinde ndjoka ya mbonyagulwa po ku Muni gwa Shakati omasiku ga zi ko pOmpumbu mpoka. Momapalakate gawo moka aakalimo mbaka otaya pula wo kutya nOmunambelewa Omukuluntupitithi gwElelo lya Shakati, Werner Iitha naye na thige po aniwa iilonga, oshoka naye okwa gandja pamwe na Meya elombwelo lyokumbonyagulitha po omagumbo nOkinde yaanona mOmpumbu.Momushangwakemo gwawo ngoka ya lesha noku gu gandja ku Meya gwa Shakati,Onesimus Shilunga, e gu pewa ku Lydia Kanime, ngoka e gu lesha pehala lyaakalimo yakwawo, aakalimo mbaka otaya ti kutya Muni gwa Shakati okwa mbonyagula po omagumbo gawo noshowo Okinde yaanona inaa gandja elondodho lya sha. Taya ti olukanda ngashi lwa Mpumbu inalu lukwa natango nolu li mepangelo lyopamuthigululwakalo, ano lya mwene gwomukunda ngoka sigo opo mpaka ina futwa ku Muni opo ku tiwe ngeno kutya Ompumbu oya Muni. Otaya ti kutya sigo oompaka Muni gwa Shakati ina futa po omuntu pehala molukanda nenge momukunda gwa Mpumbu moka, na ita vulu kutya Ompumbu oye. Taya ti kutya mwene gwomukunda Ompumbu ke na esiku limwe e ya ulikile otjeke, e yi pewa ngeno, ndjoka tayi ulike kutya Muni okwa landa ko ehala ndyoka, ano omukunda ngoka Ompumbu ku ye. ‘ Opu na ano Oveta ndjoka tayi pe Muni gwa Shakati uuthemba a kuthe aantu omahala gawo ine ya futa? Aakalimo mbaka taya pula ngawo nokugwedha ko taya pula kutya ngele oya puka sho taya pula ngawo naya lombwelwe.’Tse mOmpumbu otwa hala okutunga, otwa hala ehumokomeho, ashike Muni ote li kelele noku li ya moshipala. Oshiholelwa opwa li omunangeshefa gwetu gumwe Laurence Makana Iipinge, a li a hala oku ya tungila Oklinika mOmpumbu moka, ashike Muni sigo oompaka inaya mukula ko sha keindilo lyetu ndyoka. Tapu ya nee, meme Shitemba ngoka e tu tungile Okinde yaanona yetu mOmpumbu, ndele Muni te ya noku yi mbonyagula po pwaa na omatompelo gasha nopwaa na elondodho lyasha kwa li pakana nenge pambapila. Tse otwa li twa hala okuza mo metungo ekulu ndyoka lya kala ka li na uukalinawa tu ye mwaandjoka epe, oshoka omulongi oha adha aluhe ookoondoma dha napakana mpoka, oombapila noshowo iiyagaya yilwe nosha li nee oshiwanawa sho twa tungilwa Okinde yimwe ompe, ya yela noyi na uuyogoki. Olopota ndjika otwe yi gandjele wo ku Meya gwa Shakati, Onesimus Shilunga noshowo ku Kaansela gwaShakatiuninginino, Aram Martin noshowo ku mwene gwomukunda gwa Mpumbu, Elias Kanime, moka twe ya lombwele kutya ehala ekulu lyOkinde mOmpumbu ka li na uukalinawa notatu tungilwa po limwe ewanawa li na uukalinawa. Omolwashike Elelo lya Shakati tali mbonyagula po omatungo getu, ano lya ukilila nolya tala ashike momatungo getu, lyo itali tu pe omayakulo ga pumbiwa ngashi oku tu pa ngeno omeya, olusheno nehala lyokuthikamena ootekisa? taya pula ngawo nokutsikila ko taya pula kutya ano, Muni gwa Shakati okayamukulwa? Taya ti omolwashike inaya tango ku mwene gwomukunda gwawo manga inaya mbonyagula po omatungo gawo. Tse Aampumbu nayakwetu yokOkandjengedi mboka wo nayo mwa mbonyagula po omagumbo gawo, otatu mu indile yaa Muni gwa Shakati kutya mu tu fute omagumbo getu ngoka mwa mbonyagula po kumwe nOkinde yetu mOmpumbu.Tse iilyo yuudha yoOswapo Party mboka, kumwe nOngundu yetu yOswapo, twa hala ombili, uukumwe nuuyuki, ngashi naanaa sha kala momahogololo ga zi ko. Tse inatu hala okushendja Ongundu yetu molwashoka tatu ningwa nayi kaaleli yetu ya Muni gwa Shakati. Ngashi tu li iilyo yOngundu yetu yoSwapo, otwa hala ombili mokati ketu momukunda gwetu Ompumbu nosho tuu,’ aahololimadhilaadhilo taya ti ngawo momushangwa gwawo nokugu pa nee Meya gwa Shakati, Shilunga. Mokutaamba omukanda gwawo nguka, Meya Shilunga okwa ti kutya okwe gu taamba ko nombili. Ta ti otaye ke gu konaakona noku gu tuma wo kOombelewa dhilwe oonene ndhoka tadhi vulu wo okuungaunga nuupyakadhi wawo mbuka. Ashike nee Meya Shilunga ta lombwele aahololimadhilaadhilo, Elelo lye lya Shakati itali ka etha nande omuntu a tunge mondoolopa ya Shakati shaa li paveta. Ta ti naya ye kiitopolwandoolopa yawo ya ka lombwele yakwawo kutya hamuntu ta tungu mondoolopa ya Shakati shaa li paveta, naangoka te ke shi ninga, ota ka katukilwa onkatu kElelo lya Shakati meendelelo ngashi tashi vulika.Omautho goveta yomalelo giitopolwa evi nenge ehala kehe lili meni lyoongamba dhoshilanda sha tseiyithwa olili eliko lyewiliko lyoshilando shoka. Olundji pomahala mpoka oha patulwa omandhindhiliko okuu lika kutya oongamba dhoshilando shontumba odha hulila peni. Ishewe iilando oha yi wilikwa koamutho ngoka haga wiliki kehe oshinima tashi ningwa moshilando, kuty aokulanditha noshowo yilwe.