Aalongwa yondondo 10 moKhomas pomutenya

OYENDJI yaalongwa yongundu 10 moshitopolwa sha Khomas mboka inaa ya pita ota shi vulika ya kale yaana omahala momanongelo, onkene ota ya ka thiminikwa ya tsikile okweendulula ongundu ndjoka oku pitila mo Namcol nuumvo.

Aalongwa mbaka ita ya mono oompito dhomiipundi oshoka oongulu dhomanongelo odhuudha shinene noonkondo. O The Namibia oya kundana kutya aalongwa ayehe mboka yena iitsa 18 ita ya ka mona omahala miipundi moshitopolwa shika onkene oye na oku konga omahala gokutsikila neilongo lyawo okupitila moNamcol. Opo omulongwa a tsikile nosikola ye miipundi oku na oku kala ena iitsa 23 mekonakono lyongundu onti 10 opo a ye kondondo 11. Omunambelewa gwelongo okwa ti oshoshili kutya omanongelo ita ga ka vula oku taamba aalongwa ayehe mboka ta ya endulula miipundi. Oshoka aalongwa mboka ya piti ongundu ontimugoyi omumvo gwayi oyo tango taya pewa ompito yoku taambwa mondondo 10 opo ihe mboka ya ndopa ondondo ndjoka taya landulako ngele opena ehala. Omunambelewa omukuluntu gwelongo moKhomas, Thea Seefeldt okwa ti aalongwa ayehe moKhomas mboka ya piti ondondo 10 omumvo gwa yi ota ya taambwa ayehe momanongelo gomoshitopolwa shika. Moshitopolwa sha Hardap aalongwa yomondondo yotango otashi vulika ya kale nuupyakadhi oku mona omahala momanongelo moshitopolwa shoka. Omuwiliki gwelongo moHardap, Ben Booys okwa ti nando omuna omahala gaanangundu yotango ge li 2 200, aakuluntu yaanona unene yokomikunda oha ye ya komanongelo petameko lyomumvo gwosikola oku konga omahala goyana, shika, Booys okwa ti ohashi dhigupaleke iilonga yoshikondo she oku ninga omathaneko nokutseya kutya oya tegelela aanona yethike peni omumvo kehe. Booys okwa londodha woo kutya otashi vulika ya kale neshongo eshona naalongwa yondondo ontihetatu, unene sho moompito dhimwe mbaka ya li oyendji okuyeleka nomahala ngoka ge lipo. Moshitopolwa sha Khomas, Seefeldt okwa ti eshangitho lyaalongwa yondondo 1 sigo 8 olya manithilwe nale omumvo gwayi. Nongele opena mboka ya pumbwa omahala ngashingeyi ita pa kala uupyakadhi kombinga yaamboka. Eshongo lya taalela oshitopolwa shika, Seefeldt okwa ti oondyoka kutya aakuluntu oya hala aanona yawo ta ya k a longwa komanongelo mo Khomasdal noVenduka oku yeleka nomanongelo gomoKatutura. Sha hala okutya, oosikola dhimwe otashi vulika dhi kale dhuudha omanga dhimwe dhina omahala.Moshitopolwa Omusati omalongekidho agehe oga pwa, nomunambelewa gwelongo, Loide Shatilwe okwa ti ‘Inatu tegelela nando uupyakadhi washa. Kutya nee otwa pumbwa aanona oyendji, unene mboka yondondo yotango’. Omuwiliki gwokulipo gwelongo mOtjozondjuopa, Simon Tsuseb okwa ti uupyakadhi mboka tashi vulika wu holoke oomboka ashike waakuluntu ha ya tegelele sigo okethimbo lya hugunina oku kongela oyana omahala momanongelo.