Aalongwa yane ya kwatelwa moombete sho ya lika koonyushi

AALONGWA yane oya kwatelwa moombete moshipangelo shaShakati, konima sho ya lika nayi koonyushi pOsikola yErundu mOshakati.

Onkalo yawo otayi hokololwa tayi etitha oonkondo. Omukuluntu gwOshipangelo shika Omundohotola Shannon Kakungulu, okwa hokolola kutya oya panga aanona omilongo ntano mboka ya yi kegumbo ethimbo ndyoka omanga aalonga yaheyali ya li yakwatelwa moombete uule wethimbo lyontumba omanga omiti tadhi longo.
‘Aalongwa yane oyal i ya kwatelwa moombete sho yali ya lika shinyanyalitha koonyushi, ihe oye li monkalo yi li nawa. Otwi ineekela ya ka kale moombete uule womasiku gontumba omanga inaa lalekwa,’ Ndohotola Kakungulu ta popi ngaaka.
Ota ku popiwa kutya aanona yamwe oya li ya hindi oonyushi, dha li mu limwe lyomatungo gOombelewa dhOsikola, ya li aniwa ye dhi tsu niiti.
Shika osha geyitha nee ania oonyushi nokuponokela kehe ngoka eli mondjila yadho. Otaku hokololwa kutya opwa holoka ekuyunguto sho kehe gumwe, a tameke ta fadhukapo a ka konge uuholameno. ‘Onda mono aalongwa aayakwetu taya matuka, taya ipapula oonyushi nokusiikila
omitse dhawo. Nomulongi gwetu gumwe okwa lika wo,’, omulongwa gumwe pOsikola ndjika osha popi ngaaka.
Omukuluntusikola gwOsikola ndjika Kapolo Hofni, okwa ti kutya oonyushu dhika odhe ya pOsikola yawo m Etitatu lya zi ko, moka omo wo ye dhi lopota kUuministeli wUunamapya nOmakutu, opo ngeno ya tume aaniilonga yawo ye ye dhi kuthe po. Ashika shika ina ye shi ninga.
Oya ka tuma owala aaniilonga sho oshiponga shika sha ningwa mboka yeya noya kuthapo oonyushi dhika. Kapolo okwa ti kutya ngashiingeyi onkalo pOsikola oya shuna kuuwanawa na ootundi otadhi tsikile ngaashi shito.
Paulinus Hangula (e na okanona ke koomvula hamano hoka ta ti oka lika nayi), okwa ti ye okwa geela aanambelewa yUuministeli wOmakutu sho ina u endelele okuya u kuthe po oonyushi dhika pOsikola.
‘Omumwandje okwa adhika a lala konima yOombelewa komweendipo , ngoka e mu hupitha omanga oonyushi dhe mu kundukitha, tashu mu li. Andola omuntu nguka ina itsa omumwandje, andola katu shi wo,’ Hangula a tumbula ngaaka.
Aanambelelwa yUuministeli mbuka oye ke ya aniwa lwopotundi ontiyali, okukutha po oonyushi dhika pOsikola.