Aalongiskola mu Zim oya geela Epangelo

HARARE – Aalongiskola mu Zimbabwe oya popi kutya otaya ka ninga ekanka ngele Oshikako oshipe shOsikola sha tameke, ya geela Epangelo sho lya ndopa okugwanithwa po euvanko lyalyo kutya otali ka gwedhela oondjambi dhawo.

‘Inapu ningwa sha shomupondo kombinga yoshinima shoondjambi dhaalongisikola,’ Omupresidende gwehangano lyOmahangano gAalongiskola mu Zimbabbwe, Tendai Chikowore, osho a lombwele oshitumikundaneki sha AFP ngaaka. Aalongisikola mOosikola dhEpangelo ohaya katwa oshimaliwa shOondola dhAamerika ethele komwedhi, shoka tayi ti kutya oshishona noonkondo. Chikowore okwa ti ngele nee Epangelo itali vulu okugwedhela oondjambi dhaalongisikola, nali shunithe nee pevi ofuto yOsikola yaanona yaalongisikola. Aalongisikola mu Zimbabwe oya li ya shuna kiilonga mu Febuluali, konima sho moshilongo shika mwa totwa Epangelo lyOpaukumwe – konima sho ya li ya kla mekanka okuza petameko lyomumvo gwa zi ko – ya li ya hala ya futwe miimaliwa ya kola yopondje, molwashoka ongushu yOndola ya Zimbabwe oya gwa noonkondo. Ominista yElongo, David Coltart, okwa ti kutya eindilo lyaalongisikola otali ka talwa manga wo taku kongwa omakwathelo okuza pondje yoshilongo. – Nampa-AFP