Aalongi ya indilwa yeetepo omikalo omipe dhokulonga

AALONGI oya kumikwa yeetepo omikalo omipe dhokulonga iilongwa yawo unene mpoka pena elongo tali nyengwa nenge tali ndopa.

Ekumiko ndika olya ningwa molupe lweindilo okuza ku Ngoloneya gwoshitopolwa sha Karas, Bernadus Swartbooi pethimbo a popitha aalongisikola posikola yopombanda ya Suiderlig poKaiti etitano oshiwike sha yi.Swartbooi okwa kumike aalongi naalongwa opo ya kale nohole miilonga yawo. Okwa ti okwa tegelela opo mbaka yiitulemo opo yaadhe elalakano lyawo pomuthika gwooperesenda 80. Okwa pandula nokutanga aalongi omolwa iilonga iiwanawa yomumvo gwayi momakonakono gondondo 10 noshowo ondondo 12. Ongundu 10 iizemo yayo oya yi pombanda ehala limwe oku za pomulongo nayimwe oku ya pomulongo. Ndele iizemo yondondo 12 oya ulike eshunopevi oku za poshikolo oshititano oku kulukila poshitihamano. Okwa ti omanga onkambadhala ta yi ningwa oku kala ponomola yotango oshitopolwa oshiinyenge onkatu yimwe okuya pombanda nonkwawo okuuka pevi.Okwa ti onkatu yimwe otashi ti opena ompumbwe okulonga nuudhiginini lwomulongo.Okwa indile woo aalongi ya tule ethimbo olindji mokulonga aanona opo iizemo yekonakono yi kale iihwepo, nokwa thaneke kutya ootundi dhomanongelo nadhi lelepekwe sigo opotundi 15h00 komatango. Swartbooi okwa tseyitha woo kutya opena ethaneko okutameka iikunino yiikwamboga pomanongelo gamwe moshitopolwa opo mbika yi kwathele mokupalutha aanona mboka haya pewa nale iikulya pomanongelo ngoka.Poshiithanene osho tuu shoka, omunawino gwomahupilo, Daniel Motinga okwa popi ta kumike, a ti iilongo oyindji oha yi longitha oshimaliwa oshindji melongo, oshoka melongo omuna uuwanawa mboka hawu galukile moshigwana.Okwa ti elongo oha li gandja oompito dhomahupilo, uuyamba, noshowo iilonga iihwepo noondjambi dhili nawa.Motinga okwa ti epangelo lya Namibia oha li longitha oshimaliwa oshindji melongo okuyeleka niilongo yilwe moSADC ndele nee, iizemo yelongo ita yi tsu kumwe naashoka ha shi longiothwa ngele osha yelekwa niizemo yomakonakono goondondo 10 no 12. Motinga okwa ti konyala ooperesenda 80 sigo 90 dhiimaliwa mbyoka ha yi gandjwa kelongo oha yi futwa oondjambi dhaalongi.