Aaleli yOpamuthigululwakalo ya ningilwa oshigongiilonga

EHANGANO lya tseyika nawa lyedhina Life Line/Child Line Namibia ndjoka lya tamekele okulonga moNamibia okuza momumvo 1980, nelalakano lyokuungaunga nomikundu dhiniwe koshigwana noku shi kwathela nkene dhi na okuungaungiwa nadho na nkene dhi na okukandulwa po, olya li lya ningile Aaleli yOpamuthigululwakalo yomOukwanyama mOshitopolwa sha Hangwena oshigongiilonga mOngwediva Town Lodge mOngwediva okuza meti 12 Juli 2009 sigo eti 17 Juli 2009, mewiliko lyOmukukuluntuunganekigwEhangano ndika mOshitopolwa sha Shana, sha Hangwena, sha Musati nosha Shikoto me Cornelia Mwapangasha.

Pa meme Cornelia Mwapangasha, oshigongiilonga shomomasiku ngoka ga tumbulwa osha li sha ningilwa owina Aaleli yOpamuthigululwakalo, ano Omalenga omanene gIikandjo nomashona, ano ooyene yomikunda kumwe nOohamushanga yawo kombinga yomaudhigu ngoka haya ungaunga nago mIikandjo yawo noshowo momikunda dhawo moka. Meme Mwapangasha, ta ti Iigongiilonga mbyoka haya ningi nomauyelele ngoka haya gandja koshigwana oshikuluntu noshaanona, oga kwatela mo unene tango omuntu wiishiwe ngoye mwene, onkalo yoye yesiku kehe, omaudhigu ngoka hage ku adha ngoye mwene, nkene wu na okuungaunga nago noku ga kandula po, opo ihe nawa wu vule okuungaunga nomaudhigu gayakweni noku ga kandula po nenge okukembadhala pamwe nayo oku ga kandula po.’Omauyelele gatya ngawo ogo nee twa kala tatu gandja kOmalenga getu pethimbo lyoshigongiilonga shika, oshoka otu shi shi nawa kutya omalenga getu, unene tuu ooyene yomikunda yetu, oyo unene haya longo noshigwana oshindji shi na omaudhigu gi ili nogi ili, ngashi unene omukithi omudhipagi gwo HIV-AID, oontamana pokati kaalelwa yawo noshowo oompangu dhawo, na unene tuu kutyaOmukwaniilwa, Elenga enene nenge mwene gwomukunda noshowo Amushanga gwElelo lyOshilongo, oye na okukala taya lumbu nuuyuki, ya yela kombinga yiinima yuulingilingi, oombumbo nosho tuu, opo yi inekelwe kaalelwa yawo, nange nee oyiinekelwa kaalelwa yawo, otashi kala oshipu kuyo okulela aalelwa yawo nawa, okupwaakena nawa komaudhigu gawo, okupatukununa oontamanana dhawo noshowo oku ya kwathela miinima ya nika omikithi ngashi ngoka gwo HIV-AIDS nosho tuu, unene tuu mokulombwela oshigwana shi na mboka taya lumbu nomukuthi nguka, ye ya yakule nawa nokukala nayo nombepo yuumwayinathana nombili nonesimaneko.Pethimbo ta pata pambelewa oshigongiilonga shika, Omunambelewa Omukuluntu mElelo lyOshitopolwa sha Hangwena e na sha nokulonga naakwashigwana yomomikunda meme Josephina Hamutwe Kandjambanga, okwa pandula aaleli yopamuthigululwa ayehe mboka ya li ye ya nokukala moshigongiilonga shoka sha simana, she ya pe omauyelele ge li nawa ya li ye ga pumbwa noonkondo. ‘Oku mu taamba noku mu laleka ngeyi, pehala lyOmbelewa yetu yo RACOC, ndjoka yi li mewiliko nomekwatelokomeho lyOmunambelewa Omukuluntu mElelo lyOshitopolwa sha Hangwena, otandi ti, otu shi wete notwe shi koneka nawa kutya monkalamwenyo yetweni yesiku kehe, omu na omashongo ga yooloka, moka limwe lyomugo uupyakadhi wa etwa mokati koshigwana muuyuni nomoshilongo shetu komukithi omudhipagi gwo HIV-AIDS,’ Kandjambanga ta ti ngawo nokugwedha ko kutya omukithi ngoka ogwa eta uunkundi, uuwehame wolutu, wokomwenyo nomeliko momagumbo, momikunda moka aaleli yopamuthigululwakalo ye li taya ungaunga naalelwa yawo kehe esiku lya Kalunga.’Uunkundi wu newe kaakalimo yomoshigwana ya kwatw akomukithi nguka owo mboka kutya omuntu ita vulu we okwiilongela sha kuye mwene omoluuwehame wolutu nenge wokomwenyo.Omukithi tagu yi naakuluntu, ano nomitse dhomagumbo nokuthiga oothigwa mpoka dhaa na omukwatheli dho itadhi vulu okwiikwatha dhodhene. Onkee nee oshigongiilonga shika osha pumbiwa noonkondo opo tseni aawiliki yoshigwana ashihe shoka, tu kaleni twa peweni omauyelele nkene tu neni okuyakula nokukala naantu yetweni mbaka momikunda dhetu moka,’ Kandjambanga ta lombwele omalenga ngawo nokupandula meme Mwapangasha nongundu ye sho taya longo oshilonga sha simana ngawo.