AALELI yOpamuthigululwakalo mu Namibia ohaya futwa oshimaliwa oshishona noonkondo, kaye na oshimaliwa shomakwathelo gopaunamiti, nonande oye na oshilonga sha simana noonkondo moshigwana.
Ndhika odha popiwa koshilyo shongundu yo DTA mOmutumba gwOpashigwana, Philemon Moongo, mEtiyali lyoshiwike shika.
‘Omuleli gwOpamuthigululwakalo mu Namibia oha mono Oondola/N$23 040 komvula, tashi ti kutya oha kwatwa ashike N$1 920 lwaampoka komwedhi, ihe elenga mu South Afrika ohali mono N$94 014 komvula,’ Moongo osho a popi ngaaka.
‘Omunashipundi gwOlaata yAaleli yOpamuthigululwakalo mu Namibia oha mono N$ 28 800 komvula, omanga mbushe gwe miilonga gwa South Afrika ha mono N$311 336 komvula.
Epangelo nali tule oondjambi dhawo pu dhoka dhaaleli yalwe yopamuthigululwkalo miilongo yilwe yAafrika lyUumbugantu,’ Moongo ta popi ngaaka.
Moono okwa li e na oolista dhoondjambi dhaaleli yOpamuthigulwakalo miilongo yilwe yAafrika lyUumbugantu, ndhoka dha li wo dha topolelwa iilyo yEgumbo ndika, shoka sha li wo sha eta Omupevinashipundi gwOmutumba gwOpashigwana.
Doreen Sioka, a pule Moongo ngele shika osha pitikwa kUuhamushanga wEgumbo ndika.
Ihe Moongo okwa yamukula kutya ye ke shi shi ngele opu na oveta yatya ngaaka.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
