Aalandithi yonyama moKatutura ya geela opolisi

AALANDITHI yonyama pOsiingela moVenduka ota ya ti evundakano nuuhasha mboka aniwa wu li mopolisi ota wu tula onkalo yiilonga yawo moshiponga.

Pamahokololo gawo aapolisi oha ya talelepo ehala lyawo mpoka ha ya landithile onyama, ta ya kongo aniwa iimuna mbyoka ya yakwa.Ngele aalandithi mbaka ita ya vulu oku ulika omishangwa ndhoka ta dhi popi kutya onyama ina yi za koshimuna sha ya kwa , aapolisi oha ya kutha po onyama ndjoka sigo uuna ndoka pwa monika kutya oya za peni sho ye ya pehala mpoka.Ndele aalandithi yamwe oye na ehokololo li ili.’ Ethimbo limwe otu na omishangwa dha yela ndele natango aapolisi oha ya kutha po onyama yetu’ omukulukadhi gumwe tati.’Oha ye ya ongula eta ya kutha po onyama ndele oha ye yi thigi ashike miihauto yawo omutenya aguhe. Opo ota ya galuka esiku lya landula sho onyama ya ninga nayi, no kapena ngoka ta vulu oku yi landa.Otu na oku ninga shike nonyama yatya ngawo?’Aalandithi mbaka ota ya indile kopolisi opo aluhe yi kale ta yi tala noku konakona omitse dhiinamwenyo peha lyoku kutha po onyama ayihe.Oongombe adhihe odhi na okukala nuupapa komakutsi mboka ita u vulu okulundululwa nando okulye.Uupapa mbuka nenge omukalo nguka ogwa etwa po kehangano lyUunamapya lyaNamibia.Uuna ongombe yi na okapapa haka nena ota yi vulu okulandulwa nawa nuupu kutya oya za kofaalama peni na mwene gwoshimuna shoka oye olye.Aalandithi mbaka ta ya nyenyeta ota ya ti oku kutha po onyama yawo ita shi longo molwaashoka onyama ita yi vulu oku monika kutya oyo shimuna sha za peni.Ndele okukonakona uupapa wokomakutsi ogwo omukalo omwaanawa okumona kutya oshimuna shoka osha za peni, na shika ota shi ya pe ompito opo ya kale nonyama yawo.Oya ti ompito yo ku landitha onyama ontshona, oshoka nando ando onyama ndjoka ya li ya kuthwa po oya galulwa esiku olyo tuu ndyoka, aalandi oyendji yonyama oha ya landa onyama ya wo pethimbo lyongula.Aalandithi yamwe oya ti omukalo gumwe aniwa opo ya kale nonyama yawo ongele ashike omuntu wa gandja ombumbo kopolisi.’Oha ya ti ota tu vulu okupopya, no po nee ota pula ngaashi, omwaalu gwoodola omathele 500.Nongele owa futu oshinima ashihe oshili nawa, onyama yoye ota yi ethiwa’ aalandithi ta ya ti.Iilyo yopolisi yoshilando ye na sha nuufuthi wiimuna ka ya li po, opo ya tye sha komalundilo ngaka.Konyala aantu yane oya kwatelwe sho ya fekelwa ya li taya landitha onyama ya yakwa.Oya li ya pewa yiifutile mo noodola omayovi 5 000 kehe gumwe, ndele ha ayehe ya li ta ye shi vulu.Nonando aalandithi mbaka ota ya zimine kutya uufuthi wiimuna owo uupyakadhi uunene ota ya indile kopolisi yi konge po omukalo omuhwepo oku tula ompango miilonga.’Ota tu kanitha iiyemo’ Laban Haikonda gumwe gwomaalandithi pOsiingela ta ti ngaaka.’Kandi shi wo kutya otandi hupu ngiini.’