AALANDITHI ha ya landithile po Herero Mall moKatutura oya indile opo ya gwedhelweko ethimbo kootundi ndhoka ya pitikwa okweegulula oongeshefa dhawo pehala mpoka.
Konyala aantu omilongo ntano oya li ya ende koompadhi oku ya kombelewa onene yewiliko lyoshilando sha Venduka taya pula ethimbo lyoku landitha pehala mpoka li lelepekwe mbala nomeendelelo ngaashi tashi vulika.Aalandithi mbaka oya ti oya hala egwedhelo lyootundi dhokulanditha pehala mpoka li ningwe omanga omasiku 20 gomwedhi nguka inaa ga thika. Oya ti oya hala eindilo lyawo ndika li longwe nalyo mbala. Ndele sho ya thiki koombelewa oonene dhewiliko lyoshilando sha Venduka ina yaadhako Meya gwoshilando, oye mwaadha aniwa a zapo a ka talelapo ko Congo Brazzavile. Omupopiliko gwa muni, Josua Amukugo oye a taamba omushangwa gwomanyenyeto ngoka. Omunashipundi shokomitee yopo Herero Mall, Nicklaas Tjikuzu okwa ti yo oya hala ootundi dhoku landitha dhi lundululwe okuza potundi 007h00 sigo 22h00 mokati koshiwike, nomehulilo lyoshiwike ootundi dhi kale okuza po 007h00 sigo 24h00, ngaashi ashike pomahala gamwe goku landithila gaali pambelewa moshilando.Okwa ti oye wete kutya oya longitha oondjila adhihe ndhoka dhilipo oku pula ekwatho moshinima shika, noye na eitaalo kutya ewiliko lya muni ota li keya pulakena nawa. Okwa ti yo oya hala oku pewa eyamukulo ngashingeyi ndele ha ku uvanekelwa kutya ota li ka gandjwa komeho, okwa ti yo oya loloka oku tegelela esiku kehe. Oya ti ngele eindilo lyawo ina li pewa eyamukulo kumuni nena yo ota ye ke li fala komupopi gwoshigongi shopashigwana, Theo Ben Gurirab.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
