Aakwiita yamwe ya kwatwa po aniwa sho ya yaka po iikulya yoshikukuta po Rundu

OPOLISI ya Namibia oya kwata po aniwa aakwiita yamwe shi na sha neyako po lyiikulya yoshikukuta pOkamba yAakwiita po Rundu, Ehangano Egameni lyUuthemba wOmuntu/National Society for Human Rights (NSHR), osho lya popi.

NSHR okwa ti oonzo dhomauyelele dhi shi okwiinekela (mwa kwatelwa yimwe yi ili oshilyo shaakonakono yomonanguwi, odhe shi koleke kutya Opolisi oya kwata po aakwiita yahamano mOmaandaha shi na sha noshinima shika.Mokati kaakwiita mboka ya kwatwa po omu na aniwa Ooshisande yaali naakwiita ye na ooranka dhopevi ye li yane. NSHR okwa yo oye na omadhina gawo nosho wo omayelelel galwe agehe gawo.NSHR okwa ti aafekelwa mbaka ngashiingeyi oye li taya pulwa kakwiita aakuluntu pOkamba yAakwiita pOshaanda, manga inaya gandjwa kOpolisi. Oshiwike sha zi ko,Oshifokundaneki shimwe shomoshilongooshali sha lopota kutya omagumbo ge li 6 000 lwaampoka moshitopolwa sha Kavango, oga li ga thigwa kage na iikulya yoshikukuta sho aniwa iikulya mbika ya yakwa po.Ihe Omuprimaminista Nahas Angula okwa li a popi kutya omagumbo ogendji oga mana po iikulya yoshikukuta molwashoka mboka haya topola iikulya mbika, oya li ya dhini omwaalu gwomagumbo ngoka ga pumbwa iikulya. NSHR okwa ningi eindilo kOpolisi ya Namibia ya konakona meendelelo oshinima shika etayi gandja wo olopota yoshizemo shomakonakono gawo mu shika koshigwana.